മീററ്റ്: ഉത്തര്‍പ്രദേശില്‍ ആറു വയസുകാരനെ കഴുത്തറുത്ത് കൊന്ന പ്രതി പിടിയില്‍. മീററ്റിലെ റാംരാജ് ഗ്രാമത്തിലെ അംഗദ്വീര്‍ എന്ന കുട്ടിയാണ് ക്രൂരമായി കൊലചെയ്യപ്പെട്ടത്. സംഭവത്തില്‍ സ്വകാര്യ ബാങ്ക് മാനേജറായ മുസാഫര്‍നഗര്‍ സ്വദേശി അര്‍പിത് പരാശര്‍ (28)ആണ് പിടിയിലായത്. 

പ്രതി വിവാഹം കഴിക്കാന്‍ ഉദ്ദേശിച്ചിരുന്ന യുവതിയുടെ മകനാണ് കൊല്ലപ്പെട്ടത്. വിവാഹത്തിന് തടസമാകുമെന്ന സംശയത്തെ തുടര്‍ന്നാണ് ക്രൂരകൃത്യമെന്ന് പൊലിസ് പറഞ്ഞു. തന്റെ വീടിന് മുന്നില്‍ നില്‍ക്കുകയായിരുന്ന കുട്ടിയെ പ്രതി പ്രലോഭിപ്പിച്ച് കൂട്ടിക്കൊണ്ട് പോവുകയായിരുന്നു. കുട്ടിയുടെ മൃതദേഹം വീടിന് പത്ത് കിലോമീറ്റര്‍ അകലെ നിന്നാണ് കണ്ടെത്തിയത്. സംഭവത്തില്‍ കുട്ടിയുടെ അമ്മയായ ഗുര്‍പ്രീത് കൗറിനെയും പൊലിസ് ചോദ്യം ചെയ്യുന്നുണ്ട്. 

അന്വേഷണത്തിന്റെ ആദ്യഘട്ടത്തില്‍ മൃതദേഹം കനാലില്‍ ഉപേക്ഷിച്ചെന്നാണ് പ്രതി പൊലിസിനോട് പറഞ്ഞത്. മൂര്‍ച്ചയേറിയ ആയുധം ഉപയോഗിച്ചാണ് കൃത്യം നടത്തിയതെന്ന് പ്രതി സമ്മതിച്ചതായി പൊലിസ് വ്യക്തമാക്കി. 

ALSO READ: പകര്‍ച്ചവ്യാധി ഭീഷണി: സംസ്ഥാനത്ത് മൂന്ന് ദിവസം ഡ്രൈ ഡേ 

അതേസമയം കൊലപാതകത്തില്‍ തനിക്ക് പങ്കില്ലെന്നാണ് കുട്ടിയുടെ അമ്മയുടെ മൊഴി. കുട്ടിയുടെ പിതാവ് ദുബൈയില്‍ ട്രക്ക് ഡ്രൈവറായി ജോലി ചെയ്യുകയാണ്. കുട്ടിയെ കാണാതായതായി മുത്തശ്ശിയാണ് പരാതി നല്‍കിയത്. തുടര്‍ന്ന് പ്രദേശത്ത് സ്ഥാപിച്ചിട്ടുള്ള സിസിടിവി ദൃശ്യങ്ങള്‍ പരിശോധിച്ച് പൊലിസ് അന്വേഷണം ആരംഭിച്ചു. 

വീടിന് മുറ്റത്ത് നിന്ന് കുട്ടിയെ വെള്ളക്കാറിലെത്തിയ ഒരാള്‍ വിളിച്ച് കൊണ്ടുപോകുന്നത് പൊലിസ് കണ്ടെത്തി. കുട്ടി യാതൊരു എതിര്‍പ്പും പ്രകടിപ്പിക്കാതെ കാറിനടുത്തേക്ക് പോകുന്നത് ദൃശ്യങ്ങളില്‍ വ്യക്തമാണ്. ഇതോടെയാണ് കുട്ടിക്ക് പരിചയമുള്ള ആളാണ് പ്രതിയെന്ന നിഗമനത്തിലേക്ക് പൊലിസെത്തിയത്. തുടര്‍ന്ന് നടത്തിയ അന്വേഷണത്തില്‍ അര്‍പിത് പരാശറിനെ സംശയിക്കുന്നതായി കുടുംബം മൊഴി നല്‍കിയതോടെ പൊലിസ് ഇയാളെ പിടികൂടി അന്വേഷണം ഊര്‍ജിതമാക്കി. 

accused in the murder of a six-year-old boy in Uttar Pradesh, whose throat was slit, has been arrested.