പത്തനംതിട്ട: കായംകുളത്ത് പാമ്പ് കടിയേറ്റ് മരിച്ച യുവതിക്ക് ആശുപത്രിയില്‍ നിന്ന് ആന്റിവെനം നല്‍കിയില്ലെന്ന് ആരോപിച്ച് ബന്ധുക്കള്‍. കായംകുളം താലൂക്ക് ആശുപത്രി അധികൃതരുടെ അനാസ്ഥയാണ് യുവതിയുടെ മരണത്തിന് കാരണമെന്ന് ബന്ധുക്കള്‍ പറയുന്നു. ഇന്നലെയാണ് കായംകുളം സ്വദേശി സെലീന പാമ്പുകടിയേറ്റ് മരിച്ചത്. 

കായംകുളം കൊറ്റുകുളങ്ങരയില്‍ ബന്ധുവിന്റെ വിവാഹ സല്‍ക്കാരത്തില്‍ പങ്കെടുത്ത് മടങ്ങവെ ഇന്നലെ വൈകീട്ട് ഏഴ് മണിയോടെയാണ് യുവതിക്ക് പാമ്പ് കടിയേറ്റത്. കാറില്‍ കയറുന്നതിനിടെ പാമ്പ് കടിക്കുകയായിരുന്നു. ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായിരുന്നില്ല. 

അതേസമയം ബന്ധുക്കളുടെ ആരോപണം ആശുപത്രി അധികൃതര്‍ നിഷേധിച്ചു. പാമ്പ് കടിയേറ്റതിന്റെ ലക്ഷണങ്ങള്‍ ഇല്ലാത്തതിനാലാണ് ആന്റിവെനം നല്‍കാതിരുന്നതെന്നാണ് അധികൃതരുടെ ന്യായീകരണം. 

എന്നാല്‍ ഈ വാദം തെറ്റാണെന്ന് തെളിയിക്കുന്ന തെളിവുകള്‍ പോസ്റ്റ്‌മോര്‍ട്ടം റിപ്പോര്‍ട്ടിലുണ്ട്. പാമ്പ് കടിച്ചതിന്റെ അടയാളങ്ങള്‍ ശരീരത്തില്‍ ഉണ്ടായിരുന്നെന്ന് പ്രാഥമിക റിപ്പോര്‍ട്ടില്‍ പറയുന്നു. ശരീര ഭാഗങ്ങളില്‍ കടും നീല നിറം കണ്ടെത്തിയിട്ടുണ്ട്.