ചെന്നൈ: മകളെ കൊലപ്പെടുത്തിയ പ്രതിയെ വീട്ടില്‍ കയറി വെട്ടിക്കൊന്ന് പിതാവ്. തമിഴ്‌നാട്ടിലെ തഞ്ചാവൂരിലാണ് സംഭവം. മകളെ കൊന്ന പ്രതി ജാമ്യത്തിലിറങ്ങിയ ശേഷം പിതാവും കൂട്ടരും വീടുകയറി ആക്രമിച്ചത്. 

കഴിഞ്ഞ നവംബറിലാണ് തഞ്ചാവൂര്‍ സ്വദേശിയായ കാവ്യ കൊല്ലപ്പെട്ടത്. ആലങ്കുടി ഗവ. പ്രൈമറി സ്‌കൂളിലെ താല്‍ക്കാലിക അധ്യാപികയായിരുന്നു ഇവര്‍. പ്രണയത്തില്‍ നിന്ന് പിന്‍മാറിയതിന്റെ വൈരാഗ്യത്തില്‍ സുഹൃത്തായിരുന്ന അജിത് കുമാറെന്ന യുവാവ് കാവ്യയെ വെട്ടിക്കൊലപ്പെടുത്തുകയായിരുന്നു. സ്‌കൂട്ടറില്‍ സ്‌കൂളിലേക്ക് പോവുകയായിരുന്ന കാവ്യയെ നടുറോഡില്‍ വെച്ചാണ് അജിത് കുമാര്‍ വെട്ടിയത്. 

ALSO READ: തെരഞ്ഞെടുപ്പ് സത്യവാങ്മൂലത്തിലെ ക്രമക്കേട്; വിജയ്‌ക്കെതിരായ രണ്ടാമത്തെ ഹരജി മദ്രാസ് ഹൈക്കോടതി തള്ളി 

പിന്നാലെ പൊലിസ് പ്രതിയെ പിടികൂടുകയും അറസ്റ്റ് ചെയ്യുകയും ചെയതു. കഴിഞ്ഞ മാസം അജിത് കുമാറിന് ജാമ്യം ലഭിച്ചു. ഇതറിഞ്ഞ കാവ്യയുടെ പിതാവ് പുണ്യമൂര്‍ത്തി മൂന്ന് ബന്ധുക്കളോടൊപ്പം അജിത്തിന്റെ വീട്ടിലെത്തുകയും ഉറക്കത്തിലായിരുന്ന ഇയാളെ വെട്ടിക്കൊല്ലുകയായിരുന്നു. തുടര്‍ന്ന് നാലുപേരും അമ്മന്‍പേട്ട പൊലിസില്‍ കീഴടങ്ങുകയും ഇവരെ റിമാന്‍ഡ് ചെയ്യുകയും ചെയ്തു.