തിരുവനന്തപുരം: സംസ്ഥാനത്ത് താപനില മുന്നറിയിപ്പിൽ മാറ്റമില്ല. ഇടുക്കി, വയനാട്  ഒഴികെ 12 ജില്ലകളിലും ഇന്ന് കേന്ദ്ര കാലാവസ്ഥാ വകുപ്പ് ഉയർന്ന താപനില മുന്നറിയിപ്പ് നൽകി. ജനങ്ങൾ ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി അറിയിച്ചു. 
എന്നാൽ സംസ്ഥാനത്ത് ഒറ്റപ്പെട്ടയിടങ്ങളിൽ വേനൽ മഴയ്ക്ക് സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു. നാളെ ശക്തമായ മഴയ്ക്ക് സാധ്യതയുള്ളതിനാൽ പത്തനംതിട്ട, ഇടുക്കി ജില്ലകളിൽ യെല്ലോ അലർട്ട്  നൽകിയിട്ടുണ്ട്.
കനത്തചൂടിൽ വൈദ്യുതി ഉപഭോഗം റെക്കോഡ് മറികടന്നതോടെ സംസ്ഥാനത്ത് വൈദ്യുതി നിയന്ത്രണം പ്രഖ്യാപിച്ചിരുന്നു. പീക്ക് ലോഡ് മാനേജ്മെന്റ് എന്ന രീതിയിൽ വൈദ്യുതി നിയന്ത്രണം ഏർപ്പെടുത്താനാണ് തീരുമാനം. പ്രതിസന്ധിക്കനുസരിച്ച് 15 മുതൽ 30 മിനുട്ടു വരെ നിയന്ത്രണമുണ്ടാകും. ലോഡ് കൂടുന്നതിന് അനുസരിച്ച് പ്രാദേശികമായും നിയന്ത്രണംവരും. പ്രത്യേക സ്ഥലങ്ങളിൽ നിയന്ത്രണത്തിന്റെ സമയദൈർഘ്യം വർധിപ്പിക്കും. വൈദ്യുതി നിയന്ത്രണം എസ്.എം.എസ് വഴി ജനങ്ങളെ അറിയിക്കുമെന്നും കെ.എസ്.ഇ.ബി അറിയിച്ചു. 
പ്രഖ്യാപനമില്ലാതെ പലയിടങ്ങളിലും വൈദ്യുതി മുടങ്ങുന്നത് വലിയ പ്രതിഷേധങ്ങൾക്ക് ഇടയാക്കുന്നതിനിടെയാണ് കെ.എസ്.ഇ.ബി ലോഡ്‌ഷെഡിങ് ഏർപ്പെടുത്തുന്നത്.