ദുബൈ: വീടുകളിൽ ഉപയോഗിക്കുന്ന സ്മാർട്ട് ഉപകരണങ്ങളും നിരീക്ഷണ ക്യാമറകളും വഴി സ്വകാര്യത ലംഘിക്കപ്പെടാൻ സാധ്യതയുണ്ടെന്ന് ദുബൈ പൊലിസ്. ദുർബലമായ പാസ്‌വേഡുകളും തെറ്റായ സെക്യൂരിറ്റി ക്രമീകരണങ്ങളും സൈബർ കുറ്റവാളികൾക്ക് നിങ്ങളുടെ സ്വകാര്യ ഇടങ്ങളിലേക്ക് കടന്നുകയറാൻ അവസരമൊരുക്കുമെന്ന് അധികൃതർ ചൂണ്ടിക്കാട്ടി.

സ്മാർട്ട് ഹോം ഉപകരണങ്ങൾ ഉപയോഗിക്കുന്നവർ സുരക്ഷാ മുൻകരുതലിന്റെ ഭാഗമായി ഡിഫോൾട്ട് പാസ്‌വേഡുകൾ ഉടൻ മാറ്റണമെന്ന് ദുബൈ പൊലിസ് നിർദ്ദേശിച്ചു. അക്ഷരങ്ങളും അക്കങ്ങളും ചിഹ്നങ്ങളും ഉൾപ്പെടുത്തിയുള്ള സങ്കീർണ്ണമായ പാസ്‌വേഡുകൾ സജ്ജമാക്കുന്നതിലൂടെ ഹാക്കിംഗ് ഭീഷണി ഒരു പരിധിവരെ ഒഴിവാക്കാം. പാസ്‌വേഡുകളോ ഒടിപി വിവരങ്ങളോ എത്ര വിശ്വസനീയമെന്ന് തോന്നിയാലും അപരിചിതരുമായി പങ്കുവെക്കരുതെന്നും അധികൃതർ ഓർമ്മിപ്പിച്ചു.

ഉപകരണങ്ങളുടെ സുരക്ഷാ വിടവുകൾ പരിഹരിക്കുന്നതിനായി ഓപ്പറേറ്റിംഗ് സിസ്റ്റവും ആപ്പുകളും കൃത്യസമയത്ത് അപ്‌ഡേറ്റ് ചെയ്യേണ്ടത് അനിവാര്യമാണ്. പുതിയ സുരക്ഷാ പാച്ചുകൾ ഇൻസ്റ്റാൾ ചെയ്യുന്നത് വഴി സൈബർ ആക്രമണങ്ങളെ പ്രതിരോധിക്കാൻ സാധിക്കും. കൂടാതെ, മാൽവെയറുകൾ അടങ്ങിയേക്കാവുന്ന സംശയാസ്പദമായ ലിങ്കുകളിൽ ക്ലിക്ക് ചെയ്യുകയോ വിശ്വസനീയമല്ലാത്ത പ്ലാറ്റ്‌ഫോമുകളിൽ നിന്ന് ആപ്പുകൾ ഡൗൺലോഡ് ചെയ്യുകയോ ചെയ്യരുത്.

ALSO READ: യുഎഇയിൽ സ്കൂളുകൾക്ക് വലിയ പെരുന്നാൾ അവധി പ്രഖ്യാപിച്ചു; വിദ്യാർഥികളെ കാത്തിരിക്കുന്നത് 9 ദിവസം നീണ്ട ഇടവേള

സ്വകാര്യത ഉറപ്പാക്കുന്നതിനായി വീടിനുള്ളിലെ നിരീക്ഷണ ക്യാമറകൾ ആവശ്യമില്ലാത്ത സമയങ്ങളിൽ ഓഫ് ചെയ്തു വെക്കാൻ താമസക്കാർ ശ്രദ്ധിക്കണം. ഇത് ബാഹ്യമായ നുഴഞ്ഞുകയറ്റ സാധ്യതകൾ കുറയ്ക്കാൻ സഹായിക്കും. സംശയാസ്പദമായ സൈബർ നീക്കങ്ങൾ ശ്രദ്ധയിൽപ്പെട്ടാൽ ദുബൈ പൊലിസിന്റെ ഇ-ക്രൈം പ്ലാറ്റ്‌ഫോം വഴിയോ 901 എന്ന നമ്പറിലോ ഉടൻ റിപ്പോർട്ട് ചെയ്യണമെന്നും പൊലിസ് അറിയിച്ചു.

എന്തെങ്കിലും തരത്തിലുള്ള സൈബർ ഭീഷണികൾ നേരിടുകയോ സംശയാസ്പദമായ സാഹചര്യങ്ങൾ ശ്രദ്ധയിൽപ്പെടുകയോ ചെയ്താൽ ദുബൈ പൊലിസിന്റെ ഔദ്യോഗിക e-Crime പ്ലാറ്റ്‌ഫോം വഴി റിപ്പോർട്ട് ചെയ്യാം. അടിയന്തരമല്ലാത്ത കേസുകൾക്ക് 901 എന്ന നമ്പറിലും ബന്ധപ്പെടാവുന്നതാണ്. സൈബർ ലോകത്തെ ചാരപ്പണിയിൽ നിന്നും സുരക്ഷിതരാകാൻ ജനങ്ങൾ ജാഗ്രത പാലിക്കണമെന്ന് ക്രിമിനൽ ഇൻവെസ്റ്റിഗേഷൻ ഓർമ്മിപ്പിച്ചു.

dubai police has warned residents about rising cybersecurity risks linked to smart home devices. authorities advise users to secure wi-fi networks, update device software regularly, and strengthen passwords to prevent hacking and privacy breaches.