ടെഹ്‌റാൻ: അമേരിക്കയുമായുള്ള നയതന്ത്ര ബന്ധം കൂടുതൽ വഷളാകുന്നതിനിടെ, മേഖലയിൽ യുദ്ധം പുനരാരംഭിക്കാൻ സാധ്യതയുണ്ടെന്ന മുന്നറിയിപ്പുമായി ഇറാൻ സായുധ സേന. അമേരിക്ക ഒരു കരാറുകളോടോ ഉടമ്പടികളോടോ പ്രതിജ്ഞാബദ്ധമല്ലെന്ന് വ്യക്തമാക്കുന്ന തെളിവുകൾ തങ്ങളുടെ പക്കലുണ്ടെന്ന് ഇറാൻ അവകാശപ്പെട്ടു. ഇസ്റാഈൽ-യുഎസ് സഖ്യത്തിൽ നിന്നുള്ള ഏത് തരത്തിലുള്ള ആക്രമണത്തെയും നേരിടാൻ ഇറാൻ സൈന്യം സജ്ജമാണെന്ന് സൈനിക ആസ്ഥാന ഡെപ്യൂട്ടി മുഹമ്മദ് ജാഫർ അസദി വ്യക്തമാക്കി.

ഇറാന്റെ ആരോപണങ്ങൾ

യുഎസ് ഉദ്യോഗസ്ഥരുടെ സമീപകാല പ്രസ്താവനകൾ വെറും 'മാധ്യമ നാടകങ്ങൾ' മാത്രമാണെന്ന് ഫാർസ് വാർത്താ ഏജൻസിക്ക് നൽകിയ അഭിമുഖത്തിൽ അസദി പറഞ്ഞു.എണ്ണവിലയിലെ ഇടിവ് തടയുക, നിലവിലെ പ്രതിസന്ധികളിൽ നിന്ന് ശ്രദ്ധ തിരിക്കുക എന്നിവയാണ് അമേരിക്കയുടെ ലക്ഷ്യമെന്ന് അദ്ദേഹം ആരോപിച്ചു.

 "അമേരിക്കയുടെ ഭാഗത്തുനിന്നുള്ള ഏത് മണ്ടത്തരങ്ങളെയും സാഹസികതകളെയും നേരിടാൻ ഇറാന്റെ സായുധ സേന അതീവ ജാഗ്രതയിലാണ്," അസദി കൂട്ടിച്ചേർത്തു.

ചർച്ചകൾ വഴിമുട്ടുന്നു; വിട്ടുവീഴ്ചക്കില്ലെന്ന് ട്രംപ്

ഇറാൻ മുന്നോട്ട് വെച്ച ഏറ്റവും പുതിയ ചർച്ചാ നിർദ്ദേശങ്ങൾ യുഎസ് പ്രസിഡന്റ് ഡൊണാൾഡ് ട്രംപ് തള്ളിയതായി ഔദ്യോഗിക വാർത്താ ഏജൻസിയായ ഐആർഎൻഎ റിപ്പോർട്ട് ചെയ്തു. തനിക്ക് അംഗീകരിക്കാൻ കഴിയാത്ത ഇളവുകളാണ് ഇറാൻ ആവശ്യപ്പെടുന്നതെന്ന് ട്രംപ് വ്യക്തമാക്കി.

"അവർക്ക് കരാറിൽ താൽപ്പര്യമുണ്ട്, പക്ഷേ നിലവിലെ വ്യവസ്ഥകളിൽ ഞാൻ തൃപ്തനല്ല. ഇറാന്റെ നേതൃത്വം വിഭജിക്കപ്പെട്ടിരിക്കുകയാണ്."ഡൊണാൾഡ് ട്രംപ് പറഞ്ഞു.

നിലവിൽ വെടിനിർത്തൽ നിലനിൽക്കുന്നതിനാൽ യുദ്ധം "അവസാനിച്ചു" എന്നാണ് ട്രംപിന്റെ വാദം. എന്നാൽ, യുദ്ധം പ്രഖ്യാപിക്കാനുള്ള കോൺഗ്രസിന്റെ അധികാരത്തെ പരിമിതപ്പെടുത്തുന്ന 'യുദ്ധശക്തി പ്രമേയത്തെ' (War Powers Resolution) ഭരണഘടനാ വിരുദ്ധമെന്നാണ് അദ്ദേഹം വിശേഷിപ്പിച്ചത്.

ആണവായുധ നീക്കത്തിനെതിരെ കർശന നിലപാട്

"ഭ്രാന്തന്മാരെ ആണവായുധം കൈവശം വയ്ക്കാൻ അനുവദിക്കില്ല" എന്ന് ട്രംപ് ആവർത്തിച്ചു. ഇറാൻ ആണവ സ്ഫോടനങ്ങൾ നടത്തുന്നത് തടയാനാണ് അമേരിക്ക ലക്ഷ്യമിടുന്നത്. അതേസമയം, യുദ്ധം നിർത്തലാക്കാനുള്ള ഡെമോക്രാറ്റുകളുടെ ശ്രമം ആറാം തവണയും സെനറ്റ് നിരസിച്ചു. പ്രമേയത്തിനുള്ള മെയ് 1-ലെ അവസാന തീയതി നടപടികളില്ലാതെ അവസാനിച്ചതോടെ നിയമസഭാംഗങ്ങൾ സഭ വിട്ടു.