പുനെ: ഹിന്ദുത്വവാദി വിനായക് ദാമോദര്‍ സവര്‍ക്കര്‍ ബ്രിട്ടീഷ് ഭരണകൂടത്തിന് മുന്നില്‍ അഞ്ച് തവണ മാപ്പപേക്ഷ നല്‍കിയിരുന്നതായി കൊച്ചുമകന്‍ സത്യകി സവര്‍ക്കറുടെ വെളിപെടുത്തല്‍. പുനെയിലെ പ്രത്യേക എം.പി/എം.എല്‍.എ കോടതിയിലായിരുന്നു സത്യകിയുടെ തുറന്നു പറച്ചില്‍. കോണ്‍ഗ്രസ് നേതാവ് രാഹുല്‍ ഗാന്ധിക്കെതിരെ നല്‍കിയ അപകീര്‍ത്തിക്കേസിലെ ക്രോസ് വിസ്താരത്തിനിടെയായിരുന്നു നിര്‍ണായക മൊഴി നല്‍കിയത്.

സവര്‍ക്കര്‍ പശുവിനെ ദൈവമായി പരാമര്‍ശിച്ചിട്ടില്ലെന്നും ഉപയോഗപ്രദമായ മൃഗമായി മാത്രമേ പരാമര്‍ശിച്ചിട്ടുള്ളൂവെന്നും സത്യകി കോടതിയില്‍ പറഞ്ഞു.

ALSO READ: പശ്ചിമേഷ്യന്‍ പ്രതിസന്ധി: ഇന്ത്യയില്‍ നിന്നുള്ള അന്താരാഷ്ട്ര യാത്രക്കാരുടെ എണ്ണം മാര്‍ച്ചില്‍ ഗണ്യമായി കുറഞ്ഞതായി റിപ്പോര്‍ട്ട്

'സെല്ലുലാര്‍ ജയിലില്‍ ആയിരുന്നപ്പോള്‍ സവര്‍ക്കര്‍ അഞ്ച് തവണ ദയാഹരജികള്‍ സമര്‍പ്പിച്ചിരുന്നുവെന്ന് പറയുന്നത് ശരിയാണ്. സവര്‍ക്കര്‍ മാത്രമല്ല, നിരവധി രാഷ്ട്രീയ തടവുകാരും ബ്രിട്ടീഷ് സര്‍ക്കാരിന് സമാനമായ അപേക്ഷകള്‍ അയച്ചിട്ടുണ്ട്' സത്യകി പറഞ്ഞു. രാഹുല്‍ ഗാന്ധിയുടെ അഭിഭാഷകന്‍ മിലിന്ദ് പവാര്‍ നടത്തിയ ചോദ്യം ചെയ്യലിലായിരുന്നു സത്യകിയുടെ പ്രതികരണം.

രണ്ടാം ലോകമഹായുദ്ധകാലത്ത് ബ്രിട്ടീഷ് സൈന്യത്തിലേക്ക് ഇന്ത്യക്കാരെ റിക്രൂട്ട് ചെയ്യാനും സവര്‍ക്കര്‍ ആഹ്വാനം ചെയ്തിരുന്നു. ഭാരതത്തിന് സ്വാതന്ത്ര്യം ലഭിക്കുമ്പോള്‍ പരിശീലനം സിദ്ധിച്ച ഒരു സൈന്യം സ്വന്തമായി ഉണ്ടാകണമെന്ന ദീര്‍ഘവീക്ഷണത്തോടെയാണ് അദ്ദേഹം ഇത് ചെയ്തതെന്ന് ഇതിനെ സത്യകി ന്യായീകരിച്ചു. പശുവിനെ ദൈവമായി കാണുന്ന സങ്കല്‍പ്പത്തോട് സവര്‍ക്കര്‍ക്ക് യോജിപ്പുണ്ടായിരുന്നില്ല. പശു കേവലം ഒരു ഉപയോഗപ്രദമായ മൃഗം മാത്രമാണ്- ഇതായിരുന്നു അദ്ദേഹത്തിന്റെ നിലപാട്.

ദ്വിരാഷ്ട്ര വാദം സവര്‍ക്കറുടെ ആശയമാണെന്ന വാദവും സത്യകി തള്ളി. സര്‍ സയ്യിദ് അഹമ്മദ് ഖാനാണ് ഈ ആശയം മുന്നോട്ടുവെച്ചതെന്ന് സത്യകി ചൂണ്ടിക്കാട്ടി. സവര്‍ക്കര്‍ അതിലെ വസ്തുതകളെ കുറിച്ച് സംസാരിക്കുക മാത്രമാണ് ചെയ്തതെന്നും സത്യകി കോടതിയില്‍ പറഞ്ഞു.

ALSO READ: ദളിത് വിവാഹത്തിന് നേരെ സവർണ്ണാക്രമണം; വധുവിനെ കുതിരപ്പുറത്ത് നിന്ന് പിടിച്ചിറക്കി, വിവാഹസംഘത്തിന് നേരെ കല്ലേറ്

'സവര്‍ക്കര്‍ ദ്വിരാഷ്ട്ര ആശയം മുന്നോട്ടുവച്ചതായി ചില ചരിത്രകാരന്‍മാര്‍ ആരോപിക്കുന്നു. എന്നാല്‍ ഇത് ശരിയല്ല. ദ്വിരാഷ്ട്ര തര്‍ക്കത്തെക്കുറിച്ച് സവര്‍ക്കര്‍ വസ്തുതാപരമായ അഭിപ്രായങ്ങള്‍ പറഞ്ഞു, പക്ഷേ യഥാര്‍ത്ഥ ആശയം അദ്ദേഹത്തിന്റേതല്ല. മറിച്ച് സര്‍ സയ്യിദ് അഹമ്മദ് ഖാനാണ് മുന്നോട്ടുവച്ചത്' സത്യകി പറഞ്ഞു. 

ഓരോ മഹത്വ്യക്തികള്‍ക്കും വ്യത്യസ്തമായ അഭിപ്രായങ്ങളുണ്ടാകുമെന്നും അത് ചര്‍ച്ച ചെയ്യേണ്ടത് സര്‍ക്കാരാണെന്നുമായിരുന്നു ഭഗത് സിങ്, ബടുകേശ്വര്‍ ദത്ത് തുടങ്ങിയ വിപ്ലവകാരികളേക്കാള്‍ സവര്‍ക്കര്‍ക്ക് കൂടുതല്‍ പ്രാധാന്യം നല്‍കുന്നത് എന്തിനാണെന്ന ചോദ്യത്തിന് സത്യകി മറുപടി നല്‍കിയത്.

ALSO READ: സ്വകാര്യ ഭൂമിയിലെ സംഘടിത പ്രാര്‍ത്ഥനകള്‍ക്ക് നിയന്ത്രണം ഏര്‍പ്പെടുത്താമെന്ന് അലഹബാദ് ഹൈക്കോടതി

കോണ്‍ഗ്രസ് നേതാവ് രാഹുല്‍ ഗാന്ധി 2023 മാര്‍ച്ച് അഞ്ചിന് ലണ്ടനില്‍ നടത്തിയ പ്രസംഗത്തിനെതിരെയാണ് സത്യകി സവര്‍ക്കര്‍ കോടതിയെ സമീപിച്ചത്. സവര്‍ക്കറെ അപകീര്‍ത്തിപ്പെടുത്തുന്നതാണെന്ന് ഹരജിയില്‍ ചൂണ്ടിക്കാട്ടി. സവര്‍ക്കറെ കുറിച്ചുള്ള രാഹുലിന്റെ വിവാദ പരാമര്‍ശങ്ങള്‍ അപകീര്‍ത്തികരമാണെന്നും പ്രസംഗം യൂട്യൂബില്‍നിന്ന് നീക്കം ചെയ്യണമെന്നും സത്യകി  ആവശ്യപ്പെട്ടു. 

സവര്‍ക്കറെ വിമര്‍ശിച്ചതിന്റെ പേരില്‍ രാഹുല്‍ ഗാന്ധിക്കെതിരെ വേറെയും കേസുകളുണ്ട്. ഭാരത് ജോഡോ യാത്രയ്ക്കിടെ നടത്തിയ പരാമര്‍ശത്തിന്റെ പേരില്‍ നാസിക്കിലെ കോടതിയിലുണ്ടായിരുന്ന ഒരു കേസ് ഇക്കഴിഞ്ഞ മാര്‍ച്ചില്‍ റദ്ദാക്കിയിരുന്നു. പൊലിസ് റിപ്പോര്‍ട്ട് സമര്‍പ്പിച്ചതിന് പിന്നാലെ ഹരജിക്കാരന്‍ കേസ് പിന്‍വലിക്കാന്‍ തയ്യാറായതിനെ തുടര്‍ന്നാണ് കേസ് റദ്ദാക്കിയത്.

vinayak damodar savarkar filed five mercy petitions before the british government, his grandson sathyaki savarkar revealed during a defamation case hearing against rahul gandhi in pune court