തൊടുപുഴ:പത്തുവര്‍ഷത്തിനിടെ മുഖ്യമന്ത്രി പിണറായി വിജയന്‍ നടത്തിയത് 30 വിദേശയാത്രകള്‍. ചികിത്സയ്ക്കും സ്വകാര്യ സന്ദര്‍ശനങ്ങള്‍ക്കുമുള്‍പ്പെടെ 194 ദിവസമാണ് ഈ കാലയളവില്‍ അദ്ദേഹം വിദേശത്ത് ചെലവഴിച്ചത്. പതിനേഴ് രാജ്യങ്ങളിലായിട്ടായിരുന്നു സന്ദര്‍ശനങ്ങള്‍. കാസര്‍കോട് സ്വദേശി എ.എസ് മുഹമ്മദ് അഷ്‌റഫിന് കഴിഞ്ഞ 28ന് പൊതുഭരണ വകുപ്പ് നല്‍കിയ വിവരാവകാശ മറുപടിയിലാണ് കണക്കുകള്‍. യാത്രകളുടെ ചെലവ് സംബന്ധിച്ച മറുപടി ലഭ്യമായിട്ടില്ല.

യു.എ.ഇ, ബഹ്‌റൈന്‍, യു.എസ്.എ, നെതര്‍ലന്‍ഡ്‌സ്, സ്വിറ്റ്‌സര്‍ലന്‍ഡ്, ഫ്രാന്‍സ്,യു.കെ, ജപ്പാന്‍, ദക്ഷിണ കൊറിയ, നോര്‍വേ, ക്യൂബ, ഇന്‍ഡോനേഷ്യ, സിങ്കപ്പൂര്‍, സഊദി അറേബ്യ, ഒമാന്‍, ഖത്തര്‍, കുവൈറ്റ് എന്നീ രാജ്യങ്ങളാണ് സന്ദര്‍ശിച്ചത്. ആറ് ജി.സി.സി രാജ്യങ്ങളില്‍ മുഖ്യമന്ത്രി സന്ദര്‍ശനം നടത്തിയിട്ടുണ്ട്. ഇതില്‍ കൂടുതല്‍ തവണ സന്ദര്‍ശിച്ചത് യു.എ.ഇയാണ്, 10 തവണ.

വിദേശയാത്രകളെ ഔദ്യോഗികം, സ്വകാര്യം, ചികിത്സ എന്നിങ്ങനെ മൂന്നായി തരംതിരിക്കാം. 30 യാത്രകളില്‍ നാലെണ്ണം സ്വകാര്യ സന്ദര്‍ശനങ്ങളായിരുന്നു. സിങ്കപ്പൂര്‍, ഇന്‍ഡോനേഷ്യ, യു.എ.ഇ, യു.എസ്.എ എന്നിവിടങ്ങളിലേക്കായിരുന്നു ഈ യാത്രകള്‍. ചികിത്സയ്ക്കായി മൂന്ന് തവണ അദ്ദേഹം അമേരിക്ക സന്ദര്‍ശിച്ചു. യു.എസ്.എയിലേക്ക് ഏഴ് തവണയും, യു.കെയിലേക്ക് രണ്ട് തവണയും യാത്ര നടത്തി. സ്വകാര്യയാത്രകളിലും ചില ഔദ്യോഗിക യാത്രകളിലും ഭാര്യ കമല അനുഗമിച്ചിട്ടുണ്ട്. മന്ത്രിമാര്‍, ചീഫ് സെക്രട്ടറി, ഗവ. സെക്രട്ടറിമാര്‍, പേഴ്‌സണല്‍ സ്റ്റാഫ് അംഗങ്ങള്‍ എന്നിവരാണ് ഔദ്യോഗിക യാത്രകളില്‍ അനുഗമിച്ചിട്ടുള്ളത്. ആദ്യയാത്ര 2016 ഡിസംബര്‍ 21 മുതല്‍ 25 വരേയും ഒടുവിലത്തേത് 2025 നവംബര്‍ 30 മുതല്‍ ഡിസംബര്‍ രണ്ടുവരേയുമായിരുന്നു. ഇതു രണ്ടും യു.എ.ഇ യിലേക്കുള്ള ഒദ്യോഗിക യാത്രയായിരുന്നു.

ബന്ധപ്പെട്ട രേഖകളില്‍ ചില അവ്യക്തതകള്‍ നിലനില്‍ക്കുന്നുണ്ട്. 2018ല്‍ നടത്തിയ രണ്ട് അമേരിക്കന്‍ സന്ദര്‍ശനങ്ങളില്‍ അനുഗമിച്ച വ്യക്തികളെക്കുറിച്ചുള്ള വിവരങ്ങള്‍ രേഖകളില്‍ ലഭ്യമല്ല. ഇത് യാത്രകളിലെ സുതാര്യതയെ സംബന്ധിച്ച ചോദ്യങ്ങള്‍ ഉയര്‍ത്തുന്നുണ്ട്.