ഇടുക്കി: വണ്ടിപ്പെരിയാറില്‍ വിനോദസഞ്ചാരിയെ മര്‍ദിച്ച് കൈ ഒടിച്ച സംഭവത്തില്‍ രണ്ട് ജീപ്പ് ഡ്രൈവര്‍മാരെ പൊലിസ് അറസ്റ്റ് ചെയ്തു. കുമളി സ്വദേശികളും സഹോദരങ്ങളുമായ കലേഷ് കണ്ണന്‍, കാര്‍ത്തിക്ക് കണ്ണന്‍ എന്നിവരാണ് അറസ്റ്റിലായത്. തൃശൂര്‍ പട്ടിക്കാട് സ്വദേശി അനീഷിനാണ് ആക്രമണത്തില്‍ ഗുരുതരമായി പരുക്കേറ്റത്.

ഇന്നലെ വൈകുന്നേരമാണ് സംഭവം നടന്നത്. കുമളിയിലെ സത്രം മേഖലയിലെ ഓഫ്‌റോഡ് ഡ്രൈവിങ് നടക്കുന്ന സ്ഥലത്തിലൂടെ തൃശൂരില്‍ നിന്നെത്തിയ വിനോദസഞ്ചാരികള്‍ ബൈക്കില്‍ യാത്ര ചെയ്തതിനെ തുടര്‍ന്നാണ് തര്‍ക്കം ആരംഭിച്ചത്. ജീപ്പ് ഡ്രൈവര്‍മാരില്‍ ചിലര്‍ എതിര്‍പ്പ് പ്രകടിപ്പിച്ചതോടെ വാക്കേറ്റമുണ്ടാവുകയും പിന്നീട് സംഘര്‍ഷത്തിലേക്ക് നീങ്ങുകയും ചെയ്തു.

ALSO READ: കാറിന്റെ വില 9 കോടി, 130 രൂപ ടോള്‍ നല്‍കാനാവില്ല; പരാതിയുമായി ടോള്‍ പ്ലാസ അധികൃതര്‍ 

ആദ്യഘട്ടത്തില്‍ പ്രശ്‌നം പരിഹരിച്ച ശേഷം വിനോദസഞ്ചാരികള്‍ താമസസ്ഥലത്തേക്ക് മടങ്ങിയിരുന്നു. എന്നാല്‍ പിന്നീട് ഇരുപതോളം ജീപ്പ് ഡ്രൈവര്‍മാര്‍ റിസോര്‍ട്ടിലെത്തി ഇവരെ ആക്രമിച്ചതായാണ് പരാതി.

മര്‍ദനത്തിനിടെ അനീഷിന്റെ കൈ ഒടിയുകയും ശരീരത്തിന്റെ വിവിധ ഭാഗങ്ങളില്‍ ഗുരുതരമായി പരുക്കേല്‍ക്കുകയും ചെയ്തു. റിസോര്‍ട്ട് ജീവനക്കാരാണ് പരിക്കേറ്റ അനീഷിനെ സമീപത്തെ ആശുപത്രിയിലെത്തിച്ചത്. തുടര്‍ന്ന് വിദഗ്ധ ചികിത്സയ്ക്കായി അദ്ദേഹത്തെ തൃശൂരിലെ ആശുപത്രിയിലേക്ക് മാറ്റി.

സംഭവത്തില്‍ പൊലിസ് കേസെടുത്ത് അന്വേഷണം ആരംഭിച്ചു. ആക്രമണത്തില്‍ പങ്കെടുത്ത മറ്റ് പ്രതികളെ കണ്ടെത്തുന്നതിനുള്ള നടപടികളും പുരോഗമിക്കുകയാണെന്ന് പൊലിസ് അറിയിച്ചു.

Police arrested two jeep drivers in connection with an incident in Vandiperiyar where a tourist was beaten and his arm was broken. The arrested are Kalesh Kannan and Karthik Kannan, brothers from Kumily. Aneesh, a native of Pattikkad in Thrissur, was seriously injured in the attack.