തിരുവനന്തപുരം: നിയമസഭാ തെരഞ്ഞെടുപ്പിൽ യുഡിഎഫ് നേടിയ ഉജ്ജ്വല വിജയത്തിന് പിന്നാലെ, പാർട്ടി പ്രവർത്തകർക്ക് കർശന നിർദ്ദേശവുമായി വി.ഡി. സതീശൻ. നിയമസഭാ കക്ഷി നേതാവിനെ തിരഞ്ഞെടുക്കുന്നതിനുള്ള രണ്ടാം ഘട്ട നടപടികളിലേക്ക് ഹൈക്കമാൻഡ് കടക്കാനിരിക്കെ, ചേരിതിരിഞ്ഞുള്ള പ്രകടനങ്ങളും ഫ്ലക്സ് ബോർഡുകൾ സ്ഥാപിക്കുന്നതും ഒഴിവാക്കണമെന്ന് അദ്ദേഹം ആവശ്യപ്പെട്ടു. ഫേസ്‌ബുക്ക് പോസ്റ്റിലൂടെയായിരുന്നു അദ്ദേഹത്തിന്റെ പ്രതികരണം.

ALSO READ: തമിഴ്‌നാട്ടിൽ വിജയ് മുഖ്യമന്ത്രി പദത്തിലേക്ക്? കോൺഗ്രസിന് പിന്നാലെ പിന്തുണ പ്രഖ്യാപിച്ച് ഇടത് പാർട്ടികളും

നേതൃസ്ഥാനത്തെ ചൊല്ലി പ്രവർത്തകർ ഗ്രൂപ്പുകളായി തിരിഞ്ഞ് പ്രകടനങ്ങൾ നടത്തുന്നതോ ഫ്ലക്സുകൾ ഉയർത്തുന്നതോ ആയ നടപടികളിൽ നിന്ന് സ്നേഹപൂർവ്വം പിന്മാറണം. 102 സീറ്റുകൾ നേടി യുഡിഎഫ് ചരിത്ര വിജയം കുറിച്ച ഈ വേളയിൽ, പാർട്ടിക്കും മുന്നണിക്കും ബുദ്ധിമുട്ടുണ്ടാക്കുന്ന യാതൊരു നീക്കവും ആരുടെ ഭാഗത്തുനിന്നും ഉണ്ടാകരുത്. എഐസിസി നേതൃത്വം ഉചിതമായ തീരുമാനമെടുക്കും. അച്ചടക്കം പാലിച്ച് ഐക്യത്തോടെ മുന്നോട്ട് പോകേണ്ട നിമിഷമാണിതെന്ന് അദ്ദേഹം ഓർമ്മിപ്പിച്ചു.

ALSO READ: മുഖ്യമന്ത്രിയെ ഹൈക്കമാൻഡ് തീരുമാനിക്കും; വഴിവിട്ട പ്രകടനങ്ങൾ നടത്തിയാൽ നടപടി: കർശന നിർദ്ദേശവുമായി കെപിസിസി

 

 

"നമുക്കിത് സന്തോഷത്തിന്റെയും അഭിമാനത്തിന്റെയും നിമിഷങ്ങളാണ്. വിജയത്തിന്റെ ശോഭ കെടുത്തുന്ന പ്രവണതകൾ അനുവദിക്കില്ല. പ്രിയപ്പെട്ട പ്രവർത്തകർ ഇത്തരം നടപടികളിൽ നിന്ന് പിന്മാറണം,"എന്നും  വി.ഡി. സതീശൻ ഫെയ്സ്ബുക്കിൽ കുറിച്ചു.

കോൺഗ്രസ് നിയമസഭാ കക്ഷി നേതാവിനെ തിരഞ്ഞെടുക്കാനുള്ള ആദ്യഘട്ട നടപടികൾ പൂർത്തിയായതായും എഐസിസി രണ്ടാം ഘട്ടത്തിലേക്ക് കടക്കുകയാണെന്നും അദ്ദേഹം കൂട്ടിച്ചേർത്തു. ചരിത്ര വിജയം ആഘോഷിക്കുമ്പോൾ പാർട്ടിയുടെ അന്തസ്സ് കാത്തുസൂക്ഷിക്കാൻ എല്ലാ പ്രവർത്തകരും സഹകരിക്കണമെന്ന് അദ്ദേഹം അഭ്യർത്ഥിച്ചു.

Following the UDF's historic win of 102 seats in the Kerala Assembly elections, V.D. Satheesan has issued a strong appeal for party discipline. Via a Facebook post, he urged workers to refrain from group-based rallies and the erection of flex boards promoting specific leaders.