തിരുവനന്തപുരം: വി.ഡി. സതീശൻ മുഖ്യമന്ത്രിയായി ചുമതലയേൽക്കുന്ന പശ്ചാത്തലത്തിൽ, ആവേശം പ്രകടിപ്പിക്കാതെ അതീവ ജാഗ്രതയോടെ പ്രതികരിച്ച് മുസ്‌ലിം ലീഗ്. സതീശന്റെ വരവ് ലീഗിന്റെ സമ്മർദ്ദം മൂലമാണെന്ന തരത്തിൽ എസ്.എൻ.ഡി.പി, എൻ.എസ്.എസ് നേതൃത്വങ്ങൾ വിമർശനം ഉയർത്തിയ സാഹചര്യത്തിലാണ് ലീഗ് നിലപാട് വ്യക്തമാക്കിയത്. സാമുദായിക താൽപ്പര്യങ്ങളേക്കാൾ ജനവിധിക്കാണ് ലീഗ് പ്രാധാന്യം നൽകുന്നതെന്ന് നേതാക്കൾ അറിയിച്ചു.

ഹൈക്കമാൻഡിനെ അറിയിച്ചത് ജനവികാരം

തുടക്കം മുതൽ വി.ഡി. സതീശൻ മുഖ്യമന്ത്രിയാകണമെന്ന നിലപാടിലായിരുന്നു ലീഗ് നേതൃത്വം. കേരളത്തിലെ ജനവികാരം ഇതാണെന്ന് ലീഗ് ഹൈക്കമാൻഡിനെ കൃത്യമായി ധരിപ്പിച്ചിരുന്നു. എന്നാൽ ഇത് 'ലീഗിന്റെ നോമിനി' എന്ന നിലയിലുള്ള പ്രചാരണങ്ങൾക്ക് കാരണമായതോടെയാണ് നേതൃത്വം പ്രതികരണങ്ങളിൽ മിതത്വം പാലിക്കാൻ തീരുമാനിച്ചത്.

തീരുമാനം സ്വാഗതാർഹം: സാദിഖലി ശിഹാബ് തങ്ങൾ

ഹൈക്കമാൻഡിന്റെ തീരുമാനം കേരളത്തിലെ ജനഹിതത്തിന് അനുയോജ്യമാണെന്ന് മുസ്‌ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ പ്രതികരിച്ചു.

"ഹൈക്കമാന്റ് തീരുമാനം സ്വാഗതാർഹമാണ്. കേരള ജനതയ്ക്കൊപ്പം ലീഗും ഈ തീരുമാനത്തെ അംഗീകരിക്കുന്നു. ജനവിധിയെ മാനിച്ചുകൊണ്ടുള്ള നീക്കമാണിത്. വരുംദിവസങ്ങളിൽ തന്നെ ലീഗ് മന്ത്രിമാരുടെ കാര്യത്തിൽ തീരുമാനമുണ്ടാകുമെന്ന്."  തങ്ങൾ വ്യക്തമാക്കി.

വർഗീയ പ്രചാരണങ്ങളെ പ്രതിരോധിക്കാൻ ലീഗ്

സതീശന്റെ മുഖ്യമന്ത്രി പദത്തിന് പിന്നിൽ ലീഗിന്റെ നിയന്ത്രണമാണെന്ന വെള്ളാപ്പള്ളി നടേശന്റെയും സുകുമാരൻ നായരുടെയും ആരോപണങ്ങളെ തള്ളിക്കളയുന്ന നിലപാടാണ് പാർട്ടി സ്വീകരിക്കുന്നത്. സതീശന്റെ വിജയത്തിന് പിന്നിൽ ലീഗ് മാത്രമല്ല, വി.എം. സുധീരനെപ്പോലുള്ള മുതിർന്ന നേതാക്കൾ ഹൈക്കമാൻഡിനെ അറിയിച്ച ജനവികാരവും നിർണായകമാണെന്ന് ലീഗ് വിലയിരുത്തുന്നു.

മുന്നണിയിലെ വെല്ലുവിളികൾ

സതീശൻ സർക്കാരിൽ ലീഗിന്റെ പിന്തുണ നിർണായകമാകുമെങ്കിലും 'അഞ്ചാം മന്ത്രി' എന്ന ആവശ്യത്തിൽ കോൺഗ്രസ് എന്ത് നിലപാട് സ്വീകരിക്കുമെന്നത് കണ്ടറിയണം. കെ.സി. വേണുഗോപാൽ ഉൾപ്പെടെയുള്ള കോൺഗ്രസ് നേതൃത്വം സാമുദായിക സന്തുലിതാവസ്ഥ ചൂണ്ടിക്കാട്ടി ലീഗിന്റെ ആവശ്യങ്ങളെ പ്രതിരോധിക്കാൻ സാധ്യതയുണ്ടെന്നാണ് രാഷ്ട്രീയ നിരീക്ഷകർ കരുതുന്നത്. ഇത് മുന്നിൽക്കണ്ട് വരുംദിവസങ്ങളിൽ കരുതലോടെയുള്ള കരുനീക്കങ്ങൾക്കാകും മുസ്‌ലിം ലീഗ്  മുൻഗണന നൽകുക.