കൊല്ലം: മുഖ്യമന്ത്രിയെ തീരുമാനിച്ചതിന് പിന്നാലെ കേരള ബി.ജെ.പിയുടെ ഔദ്യോഗിക ഫേസ്ബുക്ക് പേജിൽ വർഗീയ സ്പർധയുണ്ടാക്കുന്ന ചിത്രം പങ്കുവച്ചതിൽ സംസ്ഥാന പൊലിസ് മേധാവിക്ക് പരാതി നൽകി യൂത്ത് കോൺഗ്രസ്. യൂത്ത് കോൺഗ്രസ് സംസ്ഥാന വൈസ് പ്രസിഡന്റ് വിഷ്ണു സുനിലാണ് നിയുക്ത എം.എൽ.എ രാജീവ് ചന്ദ്രശേഖറിനെതിരേ പരാതി നൽകിയത്. കോൺഗ്രസ് അധ്യക്ഷൻ മല്ലികാർജുൻ ഖാർഗെയെയും ലോക്സഭാ പ്രതിപക്ഷ നേതാവ് രാഹുൽ ഗാന്ധിയെയും അപകീർത്തിപ്പെടുത്തുകയെന്ന ഉദ്ദേശത്തിൽ ചിത്രം പങ്കുവച്ചെന്നും ഇത് കോൺഗ്രസുകാരുടെ ആത്മാഭിമാനത്തിനും വിശ്വാസത്തിനും കളങ്കമേൽക്കുന്നതാണെന്നും പരാതിയിൽ പറയുന്നു. 

സമാധാന അന്തരീക്ഷത്തിൽ ജീവിച്ചുവരുന്ന കേരളത്തിലെ ജനങ്ങളിൽ വർഗീയത ആളിക്കത്തിക്കുന്ന വാക്കുകളും ചിത്രവുമാണ് ഫേസ്ബുക്കിലൂടെ ഇവർ പ്രസിദ്ധീകരിച്ചിരിക്കുന്നത്. ജനങ്ങളിൽ ചേരിതിരിവും മതപരമായ വർഗീയതയും ഉണ്ടാക്കുന്ന തരത്തിൽ ഫേസ്ബുക്കിലൂടെ പ്രസിദ്ധീകരിച്ചിരിക്കുന്ന പോസ്റ്റിൽ കേസെടുത്ത് നടപടി സ്വീകരിക്കണമെന്നും പരാതിയിൽ ആവശ്യപ്പെടുന്നു. ഫേസ്ബുക്ക് പോസ്റ്റ് സഹിതമാണ് പരാതി നൽകിയത്.

Following the decision on the Chief Minister, the Youth Congress filed a complaint with the state police chief over a communally provocative image shared on the official Facebook page of the Kerala BJP