മനാമ: മതസൗഹാര്‍ദ്ദവും സമാധാനപരമായ സഹവര്‍ത്തിത്വവും മുന്‍നിര്‍ത്തി മുന്നേറുന്ന രാജ്യമായി ബഹ്‌റൈന്‍ ലോകത്തിന് മാതൃകയാണെന്ന് വിദേശകാര്യ മന്ത്രി ഡോ. അബ്ദുല്ലത്തീഫ് ബിന്‍ റാഷിദ് അല്‍ സയാനി പറഞ്ഞു. അന്താരാഷ്ട്ര സമാധാന സഹവര്‍ത്തിത്വ ദിനത്തോടനുബന്ധിച്ച് പുറത്തിറക്കിയ സന്ദേശത്തിലാണ് അദ്ദേഹം രാജ്യത്തിന്റെ നിലപാട് വിശദീകരിച്ചത്.

വിവിധ മതങ്ങളും സംസ്‌കാരങ്ങളും ഒരുമിച്ച് ജീവിക്കുന്ന സമൂഹമാണ് ബഹ്‌റൈനിന്റേതെന്ന് മന്ത്രി പറഞ്ഞു. പരസ്പര ബഹുമാനവും സഹിഷ്ണുതയും അടിസ്ഥാനമാക്കിയുള്ള ദേശീയ നയങ്ങളാണ് രാജ്യം പിന്തുടരുന്നതെന്നും, രാജാവ് ഹമദ് ബിന്‍ ഈസ ആല്‍ ഖലീഫയുടെ നേതൃത്വത്തില്‍ സമാധാനവും ഐക്യവും ശക്തിപ്പെടുത്തുന്ന നടപടികള്‍ക്ക് വലിയ പ്രാധാന്യം നല്‍കുന്നുണ്ടെന്നും അദ്ദേഹം വ്യക്തമാക്കി.

മതസ്വാതന്ത്ര്യത്തിനും സാംസ്‌കാരിക വൈവിധ്യങ്ങള്‍ക്കും ബഹ്‌റൈനില്‍ ഉറച്ച പിന്തുണയുണ്ടെന്ന് മന്ത്രി ചൂണ്ടിക്കാട്ടി. വിവിധ മതവിഭാഗങ്ങള്‍ക്കായി രാജ്യത്ത് ആരാധനാലയങ്ങള്‍ പ്രവര്‍ത്തിക്കുന്നതും എല്ലാ വിഭാഗങ്ങള്‍ക്കും തുല്യ പരിഗണന നല്‍കുന്നതും ബഹ്‌റൈന്റെ സാമൂഹിക സമീപനത്തിന്റെ ഭാഗമാണെന്നും അദ്ദേഹം പറഞ്ഞു. വിസ്തീര്‍ണ്ണത്തിനനുസരിച്ച് ഏറ്റവും കൂടുതല്‍ ആരാധനാലയങ്ങള്‍ ഉള്ള രാജ്യങ്ങളിലൊന്നായി ബഹ്‌റൈന്‍ അന്താരാഷ്ട്ര ശ്രദ്ധ നേടിയതും അദ്ദേഹം ഓര്‍മ്മിപ്പിച്ചു.

ALSO READ: സ്ത്രീ വേഷം ധരിച്ച് വനിതാ ചടങ്ങുകളില്‍ കടന്നാല്‍ പിഴയും തടവും; പുതിയ നിയമനിര്‍ദ്ദേശവുമായി ബഹ്‌റൈന്‍

സമൂഹത്തില്‍ വിദ്വേഷവും മതപരമായ ചേരിതിരിവുകളും വര്‍ധിപ്പിക്കുന്ന പ്രവണതകള്‍ക്കെതിരെ ജാഗ്രത വേണമെന്നും മന്ത്രി അഭിപ്രായപ്പെട്ടു. സാമൂഹിക മാധ്യമങ്ങളെയും ഡിജിറ്റല്‍ പ്ലാറ്റ്‌ഫോമുകളെയും ദുരുപയോഗം ചെയ്ത് തെറ്റായ ആശയങ്ങള്‍ പ്രചരിപ്പിക്കുന്നത് ലോക രാജ്യങ്ങള്‍ക്കുമുന്നിലുള്ള വലിയ വെല്ലുവിളിയാണെന്നും അദ്ദേഹം പറഞ്ഞു. ഇത്തരത്തിലുള്ള പ്രവണതകള്‍ തടയാന്‍ രാജ്യങ്ങള്‍ തമ്മിലുള്ള സഹകരണം അനിവാര്യമാണെന്നും അദ്ദേഹം കൂട്ടിച്ചേര്‍ത്തു.

പ്രാദേശിക സമാധാനത്തിനും ആഗോള സ്ഥിരതയ്ക്കുമായി നയതന്ത്രപരമായ സംവാദങ്ങള്‍ക്കും സഹകരണത്തിനും ബഹ്‌റൈന്‍ എപ്പോഴും പിന്തുണ നല്‍കുന്നുണ്ടെന്ന് മന്ത്രി വ്യക്തമാക്കി. ഐക്യരാഷ്ട്രസഭ ഉള്‍പ്പെടെയുള്ള അന്താരാഷ്ട്ര വേദികളില്‍ സമാധാനപരമായ പരിഹാരങ്ങള്‍ക്കും സഹവര്‍ത്തിത്വത്തിനും ബഹ്‌റൈന്‍ ശക്തമായ പിന്തുണ നല്‍കിവരികയാണെന്നും അദ്ദേഹം പറഞ്ഞു.

അയല്‍രാജ്യങ്ങളുമായുള്ള ബന്ധം ശക്തിപ്പെടുത്തുന്നതിനും മേഖലാതല സഹകരണത്തിനും ബഹ്‌റൈന്‍ പ്രത്യേക ശ്രദ്ധ നല്‍കുന്നുണ്ടെന്നും മന്ത്രി പറഞ്ഞു. സമാധാനം, സുരക്ഷ, പരസ്പര ബഹുമാനം എന്നിവ മുന്‍നിര്‍ത്തിയുള്ള സമീപനങ്ങളാണ് രാജ്യത്തിന്റെ പുരോഗതിക്ക് അടിത്തറയെന്നും അദ്ദേഹം അഭിപ്രായപ്പെട്ടു. ലോകത്തിന് മാതൃകയാകുന്ന സഹിഷ്ണുതയുടെയും സഹവര്‍ത്തിത്വത്തിന്റെയും സന്ദേശം ബഹ്‌റൈന്‍ തുടര്‍ന്നും ഉയര്‍ത്തിക്കൊണ്ടുപോകുമെന്നും മന്ത്രി കൂട്ടിച്ചേര്‍ത്തു.

Bahrain is a global model for peaceful coexistence and religious harmony, Foreign Minister Dr. Abdullatif bin Rashid Al Zayani said on the International Day of Peaceful Coexistence.