മനാമ: സ്ത്രീകളുടെ വേഷം ധരിച്ച് വനിതകള്‍ക്ക് മാത്രമായി അനുവദിച്ചിരിക്കുന്ന ഇടങ്ങളില്‍ പ്രവേശിക്കുന്നവര്‍ക്കെതിരെ കടുത്ത നടപടി സ്വീകരിക്കാന്‍ ബഹ്‌റൈനില്‍ നിയമഭേദഗതി നിര്‍ദേശം മുന്നോട്ട് വന്നു. ഇത്തരത്തിലുള്ള പ്രവൃത്തികള്‍ക്ക് ഒരു വര്‍ഷം വരെ തടവും പിഴയും നല്‍കുന്ന തരത്തിലാണ് പുതിയ ഭേദഗതി തയ്യാറാക്കിയിരിക്കുന്നത്.

ബഹ്‌റൈന്‍ പാര്‍ലമെന്റിന്റെ വിദേശകാര്യ, പ്രതിരോധ, ദേശീയ സുരക്ഷാ സമിതിയാണ് നിര്‍ദേശം പരിശോധിക്കുന്നത്. നിലവിലെ പീനല്‍ കോഡില്‍ പുതിയ വകുപ്പ് ഉള്‍പ്പെടുത്തിയാണ് നിയമം നടപ്പാക്കാന്‍ നീക്കം നടക്കുന്നത്. വനിതകള്‍ക്കായി മാത്രം നിശ്ചയിച്ചിരിക്കുന്ന ഇടങ്ങള്‍, സ്വകാര്യ ചടങ്ങുകള്‍, സ്ത്രീകള്‍ക്ക് മാത്രം പ്രവേശനമുള്ള മേഖലകള്‍ എന്നിവിടങ്ങളിലേക്ക് സ്ത്രീ വേഷം ധരിച്ച് കടക്കുന്നത് കുറ്റകരമാക്കാനാണ് ലക്ഷ്യം.

ഇത്തരം സംഭവങ്ങള്‍ സമൂഹത്തില്‍ സ്വകാര്യതാ ലംഘനത്തിനും സുരക്ഷാ പ്രശ്‌നങ്ങള്‍ക്കും കാരണമാകുന്നുവെന്ന വിലയിരുത്തലാണ് നിയമഭേദഗതിക്ക് പിന്നിലുള്ളത്. സ്ത്രീകളുടെ സ്വകാര്യ ഇടങ്ങളിലേക്ക് വേഷംമാറി പ്രവേശിക്കുന്ന സംഭവങ്ങള്‍ ചിലപ്പോള്‍ ദുരുപയോഗത്തിനും ബ്ലാക്ക്‌മെയില്‍ ശ്രമങ്ങള്‍ക്കും വഴിവെക്കുന്നതായി ചൂണ്ടിക്കാണിക്കപ്പെടുന്നു.

ALSO READ: ബഹ്‌റൈനില്‍ വീട്ടിലെ ലോക്കര്‍ തകര്‍ത്ത് സ്വര്‍ണം കവര്‍ന്നു; പ്രതികള്‍ക്ക് മൂന്ന് വര്‍ഷം തടവും ശിക്ഷയും

നിര്‍ദേശപ്രകാരം കുറ്റക്കാരനെന്ന് കണ്ടെത്തുന്നവര്‍ക്ക് ഒരു വര്‍ഷം വരെ തടവോ ആയിരം ബഹ്‌റൈന്‍ ദിനാര്‍ വരെ പിഴയോ രണ്ടും ഒരുമിച്ചോ ലഭിക്കാം. വേഷംമാറ്റം ഉപയോഗിച്ച് മറ്റേതെങ്കിലും കുറ്റകൃത്യം നടത്തുകയാണെങ്കില്‍ കൂടുതല്‍ കടുത്ത ശിക്ഷ നല്‍കാനും വ്യവസ്ഥയില്‍ പറയുന്നുണ്ട്.

സ്ത്രീകളുടെ സ്വകാര്യതയും സുരക്ഷയും ഉറപ്പാക്കുകയാണ് നിയമഭേദഗതിയുടെ പ്രധാന ലക്ഷ്യമെന്ന് സമിതി വ്യക്തമാക്കി. സമൂഹത്തില്‍ ഇത്തരം പ്രവൃത്തികള്‍ വര്‍ധിക്കുന്നതായി ശ്രദ്ധയില്‍പ്പെട്ട സാഹചര്യത്തിലാണ് കര്‍ശന നിയമ നടപടിയിലേക്ക് നീങ്ങുന്നതെന്നും റിപ്പോര്‍ട്ടില്‍ പറയുന്നു.

അതേസമയം, യു.എ.ഇ ഉള്‍പ്പെടെയുള്ള മറ്റ് ഗള്‍ഫ് രാജ്യങ്ങളിലെ സമാന നിയമങ്ങള്‍ പഠിച്ച ശേഷമാണ് ബഹ്‌റൈനും പുതിയ ഭേദഗതി പരിഗണിക്കുന്നതെന്നാണ് വിവരം. നിയമം പ്രാബല്യത്തില്‍ വന്നാല്‍ ഓരോ കേസിന്റെയും സാഹചര്യം വിലയിരുത്തി കോടതി ശിക്ഷ നിശ്ചയിക്കും.

Bahrain is considering a new law that would impose jail terms and fines on men entering women-only spaces while disguised in women’s clothing. The proposal aims to strengthen privacy and public safety protections.