തിരുവനന്തപുരം: തലസ്ഥാനത്തെ പ്രമുഖ വിനോദസഞ്ചാര കേന്ദ്രമായ വേളി ബീച്ചിൽ കുടുംബസമേതമെത്തിയ ടൂറിസ്റ്റുകൾക്ക് നേരെ ക്രൂരമായ അക്രമം അഴിച്ചുവിട്ട പ്രതിയെ വലിയതുറ പൊലിസ് അറസ്റ്റ് ചെയ്തു. വെട്ടുകാട് പൊഴിക്കര പുതുവൽപുത്തൻ വീട്ടിൽ പ്രവീൺ (27) ആണ് പിടിയിലായത്. വലിയതുറ പൊലിസ് സ്റ്റേഷനിലെ ഹിസ്റ്ററി ഷീറ്റിൽ (റൗഡി ലിസ്റ്റ്) ഉൾപ്പെട്ടിട്ടുള്ള കുപ്രസിദ്ധ കുറ്റവാളിയാണ് ഇയാളെന്ന് പൊലിസ് വ്യക്തമാക്കി.

കഴിഞ്ഞ തിങ്കളാഴ്ച വൈകുന്നേരം നാല് മണിയോടെയായിരുന്നു വേളി ബീച്ചിനെ നടുക്കിയ സംഭവം നടന്നത്. കാസർഗോഡ് സ്വദേശികളായ കുടുംബം ബീച്ചിൽ സമയം ചെലവഴിക്കാനായി എത്തിയതായിരുന്നു.

പ്ലാസ്റ്റിക് കസേരകൊണ്ട് ക്രൂരമർദ്ദനം; കാസർഗോഡ് സ്വദേശികൾക്ക് പരുക്ക്

ബീച്ചിൽ വെച്ച് പ്രതിയായ പ്രവീൺ ഈ കുടുംബത്തോട് അനാവശ്യമായി തർക്കത്തിൽ ഏർപ്പെടുകയും തുടർന്ന് അസഭ്യവർഷം നടത്തുകയുമായിരുന്നു. തർക്കം മുറുകിയതോടെ പ്രകോപിതനായ പ്രതി സമീപത്തുണ്ടായിരുന്ന പ്ലാസ്റ്റിക് കസേര കൈക്കലാക്കി കുടുംബാംഗങ്ങളെ ക്രൂരമായി തല്ലിച്ചതയ്ക്കുകയായിരുന്നു.

പ്രതിയുടെ അപ്രതീക്ഷിതമായ ആക്രമണത്തിൽ കാസർഗോഡ് സ്വദേശികളായ രണ്ടുപേർക്ക് ഗുരുതരമായി പരുക്കേറ്റു. ബീച്ചിലുണ്ടായിരുന്ന മറ്റു വിനോദസഞ്ചാരികളും നാട്ടുകാരും നോക്കിനിൽക്കെയായിരുന്നു പ്രതിയുടെ ഈ ഗുണ്ടാവിളയാട്ടം.

ഉടനടി ഇടപെട്ട് പൊലിസ്; പ്രതി റിമാൻഡിൽ

ആക്രമണത്തിന് ഇരയായ വിനോദസഞ്ചാരികൾ ഉടൻ തന്നെ വലിയതുറ പൊലിസിൽ വിവരം അറിയിക്കുകയും പരാതി നൽകുകയും ചെയ്തു. സംഭവത്തിന്റെ ഗൌരവം ഉൾക്കൊണ്ട് ഉടനടി സ്ഥലത്തെത്തിയ പൊലിസ് സംഘം പ്രതിയെ ബീച്ചിൽ വെച്ച് തന്നെ സാഹസികമായി കസ്റ്റഡിയിലെടുക്കുകയായിരുന്നു.

വിനോദസഞ്ചാരികൾക്ക് നേരെ അതിക്രമം കാണിച്ചതിനും പരുക്കേൽപ്പിച്ചതിനും പ്രതിക്കെതിരെ ജാമ്യമില്ലാ വകുപ്പുകൾ പ്രകാരം കേസെടുത്തു. അറസ്റ്റ് രേഖപ്പെടുത്തിയ പ്രവീണിനെ കോടതിയിൽ ഹാജരാക്കി റിമാൻഡ് ചെയ്തു. തലസ്ഥാനത്തെത്തുന്ന വിനോദസഞ്ചാരികളുടെ സുരക്ഷയ്ക്ക് ഭീഷണിയാകുന്ന ഇത്തരം സാമൂഹികവിരുദ്ധർക്കെതിരെ കർശന നടപടി തുടരുമെന്ന് വലിയതുറ പൊലിസ് അറിയിച്ചു.