ന്യൂഡല്‍ഹി: സോഷ്യല്‍ മീഡിയ കൂട്ടായ്മയായ കോക്രോച്ച് ജനതാ പാര്‍ട്ടി (സി.ജെ.പി) രാജ്യവ്യാപകമായി തരംഗം സൃഷ്ടിക്കുമ്പോഴും, അതിന്റെ സ്ഥാപകന്‍ അഭിജീത് ദിപ്‌കെയുടെ സുരക്ഷയെച്ചൊല്ലി ആശങ്കയിലായി മാതാപിതാക്കള്‍. വെറും അഞ്ചാറുദിവസങ്ങള്‍ കൊണ്ട് തന്നെ ഇന്‍സ്റ്റാഗ്രാമില്‍ രണ്ടുകോടിയിലധികം ഫോളോവേഴ്‌സിനെ സ്വന്തമാക്കിയ പേജിന്റെ പേരില്‍ മകന്‍ നിയമക്കുരുക്കിലോ അറസ്റ്റിലോ അകപ്പെടുമോ എന്നാണ് മഹാരാഷ്ട്ര ഛത്രപതി സംഭാജിനഗറിലുള്ള റിട്ട. എന്‍ജിനീയര്‍ മാഭഗവാന്‍ ദിപ്‌കെയുടെയും ഭാര്യ അനിത ദിപ്‌കെയുടെയും ഭയം. മകന്റെ പെട്ടെന്നുള്ള പ്രശസ്തി തങ്ങളെ കടുത്ത സമ്മര്‍ദ്ദത്തിലാക്കിയെന്നും രാഷ്ട്രീയത്തില്‍ തുടരുന്നതിനോട് യോജിപ്പില്ലെന്നും ഇരുവരും വാര്‍ത്താ ഏജന്‍സിയായ പി.ടി.ഐയോട് പറഞ്ഞു. 

ഇന്നത്തെ രാഷ്ട്രീയ സാഹചര്യം കണക്കിലെടുക്കുമ്പോള്‍ എത്ര വലിയ ഫോളോവേഴ്‌സ് ഉണ്ടായാലും പേടി സ്വാഭാവികമാണെന്ന് ഭഗവാന്‍ ദിപ്‌കെ പറഞ്ഞു.  ഇന്ത്യയിലേക്ക് മടങ്ങുമ്പോള്‍ താന്‍ അറസ്റ്റ് ചെയ്യപ്പെട്ടേക്കാം എന്ന് അഭിജീത് തന്നെ ഒരു അഭിമുഖത്തില്‍ സംശയം പ്രകടിപ്പിച്ചിരുന്നു. മകനെക്കുറിച്ചുള്ള ആധി കാരണം കഴിഞ്ഞ രണ്ട് രാത്രികളില്‍ തനിക്ക് ഉറങ്ങാന്‍ കഴിഞ്ഞിട്ടില്ലെന്നും രാഷ്ട്രീയത്തോട് കടുത്ത വെറുപ്പാണെന്നും അദ്ദേഹം വ്യക്തമാക്കി.
മകന്‍ ഡല്‍ഹിയിലോ പൂനെയിലോ മറ്റോ ഒരു സാധാരണ ജോലി ചെയ്ത് ജീവിക്കണമെന്നായിരുന്നു തങ്ങളുടെ ആഗ്രഹമെന്ന് മാതാപിതാക്കള്‍ പറയുന്നു. അയല്‍ക്കാരാണ് മകന്റെ പേജിനെക്കുറിച്ചും അവന്‍ പെട്ടെന്ന് ഹിറ്റായ കാര്യവും ആദ്യം ഇവരെ അറിയിച്ചത്.
മകന്‍ രാഷ്ട്രീയം ഉപേക്ഷിച്ച് സുരക്ഷിതമായി ജോലിയില്‍ ശ്രദ്ധ കേന്ദ്രീകരിക്കണമെന്നാണ് മാതാവ് അനിത ദിപ്‌കെക്ക് പറയാനുണ്ടായിരുന്നത്. രാഷ്ട്രീയത്തില്‍ ഇറങ്ങുന്ന കാര്യത്തില്‍ തങ്ങള്‍ മകനെ പിന്തുണയ്ക്കില്ലെന്നും അവര്‍ കൂട്ടിച്ചേര്‍ത്തു.