ചേളാരി: സമസ്ത കേരള ജംഇയ്യത്തുൽ ഉലമായുടെ സ്ഥാപിത ലക്ഷ്യമായ ആദർശ പ്രചാരണ പ്രവർത്തനങ്ങളിൽ അണുകിട വ്യതിചലിക്കാതെ മുഅല്ലിംകൾ  ആർജവത്തോടെ മുന്നേറണമെന്ന് സമസ്ത കേരള ഇസ്‌ലാം മത വിദ്യാഭ്യാസ ബോർഡ് ജനറൽ സെക്രട്ടറി എം.ടി. അബ്ദുല്ല മുസ്‌ലിയാർ പറഞ്ഞു. 'ഇതാണ് നേർവഴി' എന്ന പ്രമേയത്തിൽ സമസ്ത കേരള ജംഇയ്യത്തുൽ മുഅല്ലിമീൻ സെൻട്രൽ കൗൺസിൽ ആചരിക്കുന്ന ത്രൈമാസ ആദർശ കാമ്പയിന്റെ ഭാഗമായി ചേളാരി സെഞ്ച്വറി ഓഡിറ്റോറിയത്തിൽ സംഘടിപ്പിച്ച പ്രഭാഷക ശിൽപശാലയിൽ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. 

കോഴിക്കോട് മുഖ്യഖാസി സയ്യിദ് മുഹമ്മദ് കോയ തങ്ങൾ ജമലുല്ലൈലി ശിൽപശാല ഉദ്ഘാടനം ചെയ്തു. സയ്യിദ് ഒ.എം.എസ്. തങ്ങൾ നിസാമി പ്രാർത്ഥനക്ക് നേതൃത്വം നൽകി. സയ്യിദ് നിയാസലി ശിഹാബ് തങ്ങൾ ആമുഖ ഭാഷണം നടത്തി. സമസ്ത കേന്ദ്ര മുശാവറ അംഗം അബ്ദുസ്സലാം ബാഖവി വടക്കേക്കാട്  വിഷയാവതരണം നടത്തി. സയ്യിദ് ഫഖ്‌റുദ്ദീൻ ഹസനി തങ്ങൾ കണ്ണന്തളി സമാപന സന്ദേശം നടത്തി. 

എം.ടി. അബൂബക്കർ ദാരിമി, ജസീൽ കമാലി, അലവി ദാരിമി കുഴിമണ്ണ സംശയ നിവാരണത്തിന് നേതൃത്വം നൽകി. കെ.കെ. ഇബ്‌റാഹീം മുസ്‌ലിയാർ, അബ്ദുൽ ഖാദർ അൽ ഖാസിമി,  കെ.ടി. ഹുസൈൻകുട്ടി മുസ്‌ലിയാർ, കെ. മോയിൻകുട്ടി മാസ്റ്റർ, എം.എ. ചേളാരി, ടി.കെ. മുഹമ്മദ് കുട്ടി ഫൈസി പട്ടാമ്പി, സിദ്ദീഖ് ഫൈസി വെൺമണൽ, റഹീം വെറ്റക്കാരൻ,  ഒ.പി.എം. അശ്‌റഫ് തുടങ്ങിയവർ പ്രസംഗിച്ചു. ജനറൽ സെക്രട്ടറി കൊടക് അബ്ദുറഹ്‍മാൻ മുസ്‌ലിയാർ സ്വാഗതവും പി.എ. ശിഹാബുദ്ദീൻ മുസ്‌ലിയാർ നന്ദിയും പറഞ്ഞു. 
കേരളത്തിനകത്തും പുറത്തുനിന്നുമായി ആയിരത്തിൽപരം പണ്ഡിതന്മാർ ശിൽപശാലയിൽ പങ്കെടുത്തു.  കാമ്പയിന്റെ ഭാഗമായി മധ്യമേഖല സമ്മേളനം ജൂൺ 17ന് കോഴിക്കോട് കണ്ടംകുളം ജൂബിലി ഹാളിൽ വെച്ച് സമസ്ത പ്രസിഡൻറ് സയ്യിദ് മുഹമ്മദ് ജിഫ്‍രി മുത്തുക്കോയ തങ്ങൾ ഉദ്ഘാടനം ചെയ്യും.