മനാമ: ലോകം കാത്തിരുന്ന ഫുട്ബോൾ മാമാങ്കത്തിന് ഇന്ന് കർട്ടനുയരുമ്പോൾ, ഇന്ത്യൻ ഫുട്ബോൾ ആരാധകർക്കും അഭിമാനിക്കാൻ വകയുണ്ട്. ഇന്ത്യൻ ദേശീയ ടീം ലോകകപ്പ് യോഗ്യത നേടിയില്ലെങ്കിലും, കളിമുറ്റത്ത് ഇന്ത്യയുടെ സാന്നിധ്യമായി നാല് ഇന്ത്യൻ വംശജരായ താരങ്ങളാണ് ഇത്തവണ വിവിധ വിദേശ രാജ്യങ്ങൾക്കായി ബൂട്ട് കെട്ടുന്നത്. ന്യൂസിലൻഡ്, ഓസ്‌ട്രേലിയ, ഡി.ആർ കോംഗോ എന്നീ രാജ്യങ്ങൾക്കൊപ്പം അറബ് കരുത്തരായ ഖത്തറിന്റെ ജേഴ്‌സിയിൽ ഒരു മലയാളി താരം കൂടിയുണ്ടെന്നത് കേരളത്തിലെ ഫുട്ബോൾ പ്രേമികൾക്ക് ഇരട്ടി മധുരമേകുന്നു.

ലോകകപ്പ് പോരാട്ടത്തിൽ വ്യത്യസ്ത രാജ്യങ്ങളുടെ പ്രതിരോധ-ആക്രമണ നിരകളിൽ അണിനിരക്കുന്ന ആ നാല് ഇന്ത്യൻ വംശജരായ കളിക്കാരെ പരിചയപ്പെടാം.

1. തഹ്‌സിൻ മുഹമ്മദ് ജംഷിദ് (ഖത്തർ)

ഈ ലോകകപ്പിലെ മലയാളി തിളക്കമാണ് പത്തൊൻപതുകാരനായ വിംഗർ തഹ്‌സിൻ ജംഷിദ്. ഖത്തർ തലസ്ഥാനമായ ദോഹയിൽ മലയാളി മാതാപിതാക്കൾക്ക് ജനിച്ച തഹ്‌സിൻ, ഖത്തറിന്റെ ജൂനിയർ ടീമുകളിലൂടെയാണ് വളർന്നുവന്നത്. ഖത്തർ അണ്ടർ-16, അണ്ടർ-17 ടീമുകളിലെ മികച്ച പ്രകടനത്തിന് പിന്നാലെ അഫ്ഗാനിസ്ഥാനെതിരായ യോഗ്യതാ മത്സരത്തിലൂടെ സീനിയർ ടീമിൽ അരങ്ങേറ്റം കുറിച്ചു. വേഗതയാണ് ഈ യുവതാരത്തിന്റെ പ്രധാന കരുത്ത്.

2. സർപ്രീത് സിംഗ് (ന്യൂസിലൻഡ്) 

ന്യൂസിലൻഡിലെ ഓക്ക്‌ലൻഡിൽ ജനിച്ച സർപ്രീത് സിംഗിന്റെ കുടുംബ വേരുകൾ പഞ്ചാബിലാണ്. 27 കാരനായ ഈ അറ്റാക്കിംഗ് മിഡ്‌ഫീൽഡർ എ-ലീഗ് ക്ലബ്ബായ വെല്ലിംഗ്ടൺ ഫീനിക്സിലൂടെയാണ് കരിയർ ആരംഭിച്ചത്. പിന്നീട് വിഖ്യാത ജർമ്മൻ ക്ലബ്ബായ ബയേൺ മ്യൂണിക് സർപ്രീതിനെ സ്വന്തമാക്കിയിരുന്നു. നിലവിൽ സെർബിയൻ ക്ലബ് എഫ്‌കെ ടി‌എസ്‌സിയിൽ നിന്ന് ലോണിൽ വെല്ലിംഗ്ടണിലേക്ക് തിരിച്ചെത്തിയ സർപ്രീത്, കളി മെനയുന്നതിലും ഗോൾ നേടുന്നതിലും മിടുക്കനാണ്.

 

 

3. സാമുവൽ മൗതൗസാമി (ഡി.ആർ കോംഗോ) 

ഡെമോക്രാറ്റിക് റിപ്പബ്ലിക്ക് ഓഫ് കോംഗോയ്ക്ക് വേണ്ടി മധ്യനിരയിൽ പോരാടാനിറങ്ങുന്ന സാമുവൽ മൗതൗസാമി ഒരു തമിഴ് വംശജനാണ്. ഫ്രാൻസിൽ ജനിച്ച 29 കാരനായ മൗതൗസാമിയുടെ അമ്മ കോംഗോ സ്വദേശിനിയാണ്. നിലവിൽ ഗ്രീക്ക് സൂപ്പർ ലീഗ് ക്ലബ്ബായ അട്രോമിറ്റോസിന്റെ താരമായ മൗതൗസാമി, ആഫ്രിക്കൻ കപ്പ് ഓഫ് നേഷൻസിലടക്കം കോംഗോയ്ക്കായി മികച്ച പ്രകടനമാണ് പുറത്തെടുത്തത്.

 

 

4. നിഷാൻ വേലുപ്പിള്ള (ഓസ്‌ട്രേലിയ)

ഓസ്‌ട്രേലിയൻ ടീമിന്റെ ആക്രമണ നിരയിലെ പ്രധാനിയായ 25 കാരനായ നിഷാൻ വേലുപ്പിള്ള ആംഗ്ലോ-ഇന്ത്യൻ പാരമ്പര്യമുള്ള കളിക്കാരനാണ്. ശ്രീലങ്കൻ വേരുകളുള്ള മലേഷ്യൻ പിതാവിനും ആംഗ്ലോ-ഇന്ത്യൻ അമ്മയ്ക്കും മെൽബണിലാണ് നിഷാൻ ജനിച്ചത്. മെൽബൺ വിക്ടറി ക്ലബിന്റെ വിംഗറായ നിഷാൻ, കഴിഞ്ഞ വർഷം ചൈനയ്‌ക്കെതിരായ ലോകകപ്പ് യോഗ്യതാ മത്സരത്തിൽ മിന്നും ഗോൾ നേടി ശ്രദ്ധ പിടിച്ചുപറ്റിയിരുന്നു.

 

 

ഇന്ത്യയിൽ ക്രിക്കറ്റിനാണ് കൂടുതൽ ജനപ്രീതിയെങ്കിലും, ലോകകപ്പ് കാലമായാൽ മലയാളികൾ അടക്കമുള്ള ഇന്ത്യൻ കായിക പ്രേമികൾ ഫുട്ബോൾ ലഹരിയിലാകും. ഇത്തവണ സ്വന്തം ചോരയും വേരുകളുമുള്ള നാല് കളിക്കാർ മൈതാനത്തിറങ്ങുമ്പോൾ ആവേശം ഇരട്ടിക്കുമെന്നുറപ്പാണ്.

The FIFA World Cup 2026 begins today, featuring four players of Indian origin on football’s biggest stage, including a Malayali footballer representing Qatar in the global tournament.