ബാലുശ്ശേരി: ബാലുശ്ശേരി കോട്ട വേട്ടയ്ക്കൊരുമകന്‍ ക്ഷേത്രത്തിലെ സ്വര്‍ണ ഉരുപ്പടികള്‍ കാണാതായ കേസില്‍ മുന്‍ എക്സിക്യൂട്ടീവ്ഓഫീസറായ ടി.ടി. വിനോദനെ ബാലുശ്ശേരി പൊലിസ് അറസ്റ്റ് ചെയ്തു. കേസില്‍ നടപടി വൈകുന്നതിനെതിരേ പ്രതിഷേധമുയര്‍ന്നിരുന്നു. ഇതിന് പിന്നാലെയാണ് ഇപ്പോള്‍ അറസ്റ്റ് ഉണ്ടായിരിക്കുന്നത്.

എട്ട് മാസം മുന്‍പ് നടന്ന ഓഡിറ്റിലാണ് ക്ഷേത്രത്തില്‍ നിന്ന് 20 പവനിലധികം സ്വര്‍ണ ഉരുപ്പടികള്‍ കാണാതായതായി കണ്ടെത്തിയത്. തുടര്‍ന്ന് ടി.ടി. വിനോദനെതിരെ പൊലിസ്് കേസെടുത്ത് അന്വേഷണം ആരംഭിച്ചു. എന്നാല്‍ ഇത്രയും കാലം കഴിഞ്ഞിട്ടും പ്രതിയെ കണ്ടെത്താനോ സ്വര്‍ണം വീണ്ടെടുക്കാനോ കഴിഞ്ഞിരുന്നില്ല.

ബാലുശ്ശേരി കോട്ട ക്ഷേത്രത്തിന് പുറമെ മറ്റ് മൂന്ന് ക്ഷേത്രങ്ങളില്‍ നിന്നും സ്വര്‍ണ ഉരുപ്പടികള്‍ നഷ്ടമായതായി റിപ്പോര്‍ട്ടുകളുണ്ടെങ്കിലും അവിടങ്ങളില്‍ കേസുകള്‍ രജിസ്റ്റര്‍ ചെയ്തിരുന്നില്ല.

അതേസമയം, നഷ്ടപ്പെട്ട സ്വര്‍ണം തിരികെ നല്‍കി കേസ് ഒത്തുതീര്‍ക്കാനുള്ള ശ്രമങ്ങള്‍ നടന്നുവെന്ന വിവരങ്ങളും പുറത്തുവന്നിരുന്നു. ഇതിനെതിരേപ്രതിഷേധം ശക്തമായതോടെ പൊലിസ് അറസ്റ്റ് നടപടിയിലേക്ക് കടക്കുകയായിരുന്നു.

കേസില്‍ കൂടുതല്‍ അന്വേഷണം തുടരുകയാണെന്ന് പൊലിസ് അറിയിച്ചു.

Balussery police have arrested former executive officer T.T. Vinod in connection with the missing gold ornaments from the Balussery Kotta Vettakkorumakan temple. There had been protests against the delay in the action in the case.