ദുബൈ: ബംഗ്ലാദേശ് മുന്‍ പൊലിസ് മേധാവിയും ഇന്‍സ്‌പെക്ടര്‍ ജനറലുമായിരുന്ന ബേനസീര്‍ അഹമ്മദ് യു.എ.ഇയില്‍ അറസ്റ്റിലായി. ഇന്റര്‍പോളിന്റെ റെഡ് നോട്ടീസിന്റെ അടിസ്ഥാനത്തിലാണ് നടപടി. ജൂണ്‍ 12ന് ദുബൈയില്‍ വച്ചാണ് ഇദ്ദേഹം അറസ്റ്റിലായതെന്ന് ബംഗ്ലാദേശ് ആഭ്യന്തര മന്ത്രി സലാഹുദ്ദീന്‍ അഹമ്മദ് പാര്‍ലമെന്റില്‍ സ്ഥിരീകരിച്ചു. രാജിവച്ച് നാടുവിട്ട ശെയ്ഖഅ ഹസീനയുടെ കാലത്തെ പ്രധാന ഉദ്യോഗസ്ഥനാണ് ബേനസീര്‍.
അഴിമതിക്കേസുകളും സാമ്പത്തിക ക്രമക്കേടുകളും ഉള്‍പ്പെടെയുള്ള ഗുരുതരമായ ആരോപണങ്ങളെത്തുടര്‍ന്ന് ബേനസീര്‍ അഹമ്മദിനെതിരെ നടപടികള്‍ സ്വീകരിച്ചു വരികയായിരുന്നു. ഇദ്ദേഹത്തെ എത്രയും വേഗം ബംഗ്ലാദേശിലേക്ക് തിരികെ എത്തിക്കാനുള്ള നടപടികള്‍ സ്വീകരിച്ചു വരുന്നതായി ആഭ്യന്തര മന്ത്രി അറിയിച്ചു.
2024 മെയിലാണ് ബേനസീര്‍ അഹമ്മദ് ബംഗ്ലാദേശ് വിട്ടത്. അനധികൃതമായി കോടിക്കണക്കിന് രൂപയുടെ സ്വത്ത് സമ്പാദിച്ചുവെന്ന ആരോപണമുയര്‍ന്നതിനെത്തുടര്‍ന്ന് രാജ്യത്ത് വലിയ ജനരോഷം ഉയര്‍ന്നിരുന്നു. മുന്‍ പ്രധാനമന്ത്രി ശൈഖ് ഹസീനയുടെ അടുത്ത അനുയായിയായിരുന്ന ഇദ്ദേഹത്തിനെതിരെ 2021ല്‍ അമേരിക്കയും ഉപരോധം ഏര്‍പ്പെടുത്തിയിരുന്നു. റാപ്പിഡ് ആക്ഷന്‍ ബറ്റാലിയന്റെ തലവനായിരിക്കെ നടന്ന മനുഷ്യാവകാശ ലംഘനങ്ങളും തിരോധാനങ്ങളും ചൂണ്ടിക്കാട്ടിയായിരുന്നു അമേരിക്കന്‍ നടപടി.
രാജ്യത്തെ അഴിമതിക്കെതിരായ പോരാട്ടത്തിലെ വലിയൊരു നാഴികക്കല്ലാണിതെന്നും, എത്ര ഉന്നതനായാലും നിയമത്തിന് അതീതമായി ആരുമില്ലെന്ന് ഉറപ്പുവരുത്തുമെന്നും ആഭ്യന്തര മന്ത്രി സലാഹുദ്ദീന്‍ അഹമ്മദ് വ്യക്തമാക്കി.

Summary: Former Inspector General of Police, Benazir Ahmed, has been arrested in Dubai by the UAE city police in connection with a case filed by the Bangladesh Anti-Corruption. 
Dubai police arrested him with the help of Interpol in an ACC case on June 12, he said.