പന്തല്ലൂര്‍ : ലോകകപ്പ് ആവേശത്തില്‍ കാരുണ്യത്തിന്റെ ഗോള്‍ പോസ്റ്റിലേക്ക് ഗോളടിച്ച് ഫുള്‍ബോള്‍ ക്ലബ്. ആനക്കയം മുതല്‍ കിടങ്ങയം വരെയുള്ള യുവാക്കളുടെ സംഘടനയായ 'മോര്‍ണിംഗ് ഫുട്‌ബോള്‍ വൈബ്' കൂട്ടായ്മയാണ് പന്തല്ലൂര്‍ പെയിന്‍ ആന്‍ഡ് പാലിയേറ്റീവ് കെയറിന് സ്‌നേഹസമ്മാനമായി ഒരു പുതിയ ഹോം കെയര്‍ വാഹനം സംഭാവന ചെയ്തത്.

കട്ടൗട്ടുകളിലും ഫ്‌ലെക്‌സുകളിലും ആര്‍പ്പുവിളികളിലും ഒതുങ്ങാതെ, കളിയാവേശം സമൂഹനന്മയ്ക്ക് പ്രയോജനപ്പെടുത്തണമെന്ന ആലോചനയിലാണ് ഈ ആശയം ഉണ്ടായതെന്ന് സംഘാടകര്‍ പറഞ്ഞു. 

മുടിക്കോട് റോയല്‍ പ്ലാസ ഓഡിറ്റോറിയത്തില്‍ നടന്ന ഫുട്‌ബോള്‍ കൂട്ടായ്മ അംഗങ്ങളുടെ കുടുംബ സംഗമത്തില്‍ വെച്ച്, സാമൂഹിക പ്രവര്‍ത്തക ഫൗസിയ കിടങ്ങയത്തില്‍ നിന്ന് പാലിയേറ്റീവ് കെയര്‍ ഭാരവാഹികള്‍ വാഹനത്തിന്റെ കീ ഏറ്റുവാങ്ങി. 

പന്തല്ലൂരിന്റെ കായിക സ്വപ്നങ്ങള്‍ക്ക് ചിറക് നല്‍കാന്‍ മിനി സ്റ്റേഡിയത്തിന് സൗജന്യമായി സ്ഥലം നല്‍കിയ ഇല്ലിക്കല്‍ റസാക്കിനെ ചടങ്ങില്‍ ആദരിച്ചു.

റമീസ് മാസ്റ്റര്‍ അധ്യക്ഷത വഹിച്ചു. സി.എം. ഫൈസല്‍, കെ. കെ . സിറാജ്, എം പി.ഷാഫി എന്നിവര്‍ മുഖ്യാതിഥികള്‍ക്ക് ഉപഹാരം നല്‍കി. കെ പി നൗഷാദ്, കെ മുനീര്‍, പി പി സന്തോഷ് തുടങ്ങിയവര്‍ നേതൃത്വം നല്‍കി. സി എം സിറാജ്ജുദ്ധീന്‍ സ്വാഗതവും, സി എച്ച് അനീസ് നന്ദിയും പറഞ്ഞു. ജില്ലാ പഞ്ചായത്ത് അംഗം കെ.വി. മുഹമ്മദാലി, അന്‍സില്‍ മഞ്ചേരി,നടി കവിത ബൈജു എന്നിവര്‍ മുഖ്യഅതിഥികളായി,ടി അനീസ് മാസ്റ്റര്‍,പി പി. രാജേന്ദ്രബാബു,ജോജോ മാസ്റ്റര്‍,സി.എം. സഹീര്‍, കെ.പി. മുഹമ്മദ് ഷാഫി,സി. പി മുഹമ്മദ് മാസ്റ്റര്‍, റഷീദ് മന്നിയില്‍ ആശംസകള്‍ അര്‍പ്പിച്ചു.

മോര്‍ണിംഗ് ഫുട്‌ബോള്‍ വൈബ് കുടുംബാംഗങ്ങള്‍, പാലിയേറ്റീവ് വളന്റിയര്‍മാര്‍, നാട്ടുകാര്‍, ക്ലബ് പ്രതിനിധികള്‍ ചടങ്ങില്‍ സംബന്ധിച്ചു.