ഇടുക്കി: കളിയാക്കിയെന്നാരോപിച്ച് അധ്യാപകന്‍ ഏഴാം ക്ലാസ് വിദ്യാര്‍ഥിയെ ക്രൂരമായി മര്‍ദിച്ചു. ഇടുക്കി അണക്കരയിലാണ് സംഭവം. ചൂരല്‍ കൊണ്ട് തുടയിലും, ദേഹത്തും അടിച്ചെന്നും മുഖത്ത് കൈകൊണ്ട് അടിച്ചെന്നും വിദ്യാര്‍ഥി വെളിപ്പെടുത്തി. സംഭവത്തില്‍ അധ്യാപകനെതിരെ വണ്ടന്‍മേട് പൊലിസ് കേസെടുത്തു. 

വ്യാഴാഴ്ച്ചയാണ് സംവം. തമിഴ് മീഡിയം അധ്യാപകനായ ശിവകുമാറാണ് കുട്ടിയെ മര്‍ദിച്ചത്. തന്നെ കളിയാക്കിയെന്ന് ആരോപിച്ചായിരുന്നു മര്‍ദനം. മാതാപിതാക്കള്‍ നല്‍കിയ പരാതിയില്‍ ജുവനൈല്‍ ജസ്റ്റിസ് ആക്ട് അടക്കം ചുമത്തിയാണ് പൊലിസ് കേസ് രജിസ്റ്റര്‍ ചെയ്തത്. അധ്യാപകനോട് ഒരുമാസം നിര്‍ബന്ധിത അവധിയില്‍ പോകാന്‍ പിടിഎ നിര്‍ദേശിച്ചിട്ടുണ്ട്. 

ALSO READ: കെ.എസ്.ഇ.ബിക്ക് താൽക്കാലിക ആശ്വാസം; ഉയർന്ന വിലയ്ക്ക് വൈദ്യുതി വാങ്ങാൻ റെഗുലേറ്ററി കമ്മിഷന്റെ അനുമതി

പിടിഎ നടത്തിയ അന്വേഷണത്തില്‍ ക്ലാസ് മുറിയില്‍ മറ്റ് കുട്ടികളുടെ മുന്നില്‍വെച്ച് വടികൊണ്ട് പലതവണ അടിച്ചതായി കുട്ടികള്‍ പറഞ്ഞു. വിവരങ്ങള്‍ പ്രധാന അധ്യാപകനെ അറിയിക്കുന്നതില്‍ വീഴ്ച്ച വരുത്തിയതായും കണ്ടെത്തിയിട്ടുണ്ട്. സംഭവ സമയത്ത് ക്ലാസില്‍ ഉണ്ടായിരുന്ന കുട്ടികള്‍ക്ക് കൗണ്‍സിലിങ് നല്‍കാനാണ് തീരുമാനം. 

സംഭവത്തില്‍ ജില്ലാ വിദ്യാഭ്യാസ ഓഫീസില്‍ നിന്നുള്ള സംഘം സ്‌കൂളിലെത്തി കുട്ടികളില്‍ നിന്നും അധ്യാപകരില്‍ നിന്നും വിവരങ്ങള്‍ ശേഖരിച്ചു. റിപ്പോര്‍ട്ടിന്റെ അടിസ്ഥാനത്തില്‍ അധ്യാപകനെതിരെ വകുപ്പുതല നടപടിയുണ്ടാകും. അന്വേഷണവുമായി സഹകരിക്കുമെന്ന് പിടിഎ അറിയിച്ചിട്ടുണ്ട്.