അബുദബി: റോഡിൽ കൃത്യമായ അകലം പാലിക്കാതെയും ശ്രദ്ധയില്ലാതെയും വാഹനമോടിക്കുന്നത് മൂലമുണ്ടാകുന്ന അപകടങ്ങളുടെ ഞെട്ടിക്കുന്ന ദൃശ്യങ്ങൾ പുറത്തുവിട്ട് അബുദബി പൊലിസ്. ഗതാഗതം മന്ദഗതിയിലായ സമയത്ത് മതിയായ സുരക്ഷിത അകലം പാലിക്കാത്തതിനെ തുടർന്ന് ഒന്നിലധികം വാഹനങ്ങൾ കൂട്ടിയിടിക്കുന്നതാണ് വീഡിയോയിലുള്ളത്.

പൊലിസ് പുറത്തുവിട്ട ദൃശ്യത്തിൽ, അമിതവേഗതയിലെത്തിയ ഒരു കാർ മുന്നിലുള്ള വാഹനത്തിന്റെ പിൻഭാഗത്ത് ശക്തമായി ഇടിക്കുന്നതും, ആഘാതത്തിൽ മുന്നിലുണ്ടായിരുന്ന വാഹനം റോഡിലേക്ക് പൂർണ്ണമായും മറിഞ്ഞു വീഴുന്നതും ദൃശ്യമാണ്.

റോഡിൽ നിന്നുള്ള ഡ്രൈവർമാരുടെ ശ്രദ്ധ തിരിയുന്നതാണ് ഇത്തരം ഗുരുതരമായ ഗതാഗത അപകടങ്ങൾക്ക് പ്രധാന കാരണമെന്ന് അബുദബി പൊലിസ് ഓർമ്മിപ്പിച്ചു. വാഹനമോടിക്കുമ്പോൾ താഴെ പറയുന്ന കാര്യങ്ങളിൽ ഏർപ്പെടരുതെന്ന് അധികൃതർ കർശന നിർദേശം നൽകി:

• മൊബൈൽ ഫോണിൽ ഇന്റർനെറ്റ്, സോഷ്യൽ മീഡിയ സൈറ്റുകൾ ബ്രൗസ് ചെയ്യുക.
• ഫോൺ കോളുകൾ ചെയ്യുകയോ ഫോട്ടോകൾ എടുക്കുകയോ ചെയ്യുക.
• ഡ്രൈവറുടെ ശ്രദ്ധ റോഡിൽ നിന്ന് മാറ്റുന്ന മറ്റ് പ്രവൃത്തികളിൽ ഏർപ്പെടുക.

ശിക്ഷാ നടപടികൾ കടുപ്പിച്ച് പൊലിസ്

വാഹനമോടിക്കുന്നതിനിടയിൽ ശ്രദ്ധ തിരിക്കുന്ന തരത്തിലുള്ള പ്രവൃത്തികളിൽ ഏർപ്പെടുന്നത് ഗുരുതരമായ നിയമലംഘനമായാണ് യുഎഇ കണക്കാക്കുന്നത്. നിയമം ലംഘിക്കുന്നവർക്ക് 800 ദിർഹം പിഴയും നാല് ട്രാഫിക് ബ്ലാക്ക് പോയിന്റുകളും ശിക്ഷയായി ലഭിക്കും.

റോഡിൽ എപ്പോഴും ജാഗ്രത പാലിക്കണമെന്നും, മുൻപിലുള്ള വാഹനങ്ങളുമായി സുരക്ഷിതമായ അകലം പാലിക്കാൻ എല്ലാ ഡ്രൈവർമാരും തയ്യാറാകണമെന്നും അബുദബി പൊലിസ് ആവർത്തിച്ച് ആവശ്യപ്പെട്ടു.

Abu Dhabi Police released shocking crash footage to warn motorists about reckless driving, urging drivers to follow traffic laws, avoid dangerous behavior, and help improve road safety across the UAE.