മലപ്പുറം: സ്വകാര്യ ഹജ്ജ് ഗ്രൂപ്പുകളിൽ നിന്ന് അപേക്ഷ ക്ഷണിച്ച് കേന്ദ്ര ന്യൂനപക്ഷ ഹജ്ജ് മന്ത്രാലയം. ഇന്ത്യക്ക് സഊദി അറേബ്യ നിശ്ചയിച്ച് നൽകുന്ന ക്വാട്ടയുടെ 30 ശതമാനമാണ് സ്വകാര്യ ഗ്രൂപ്പുകൾക്ക് നൽകുക. ഇന്ത്യയുടെ ക്വാട്ട 1.75,025 ആണ്. ഇത് പ്രകാരം സ്വകാര്യഗ്രൂപ്പുകൾക്ക് 52,507 ക്വാട്ടയാണ് ലഭിക്കുക.

    സാമ്പത്തിക ഭദ്രത, പരിചയസമ്പത്ത്, വിശ്വാസ്യതയുള്ള ടൂർ ഓപ്പറേറ്റർമാരിൽ നിന്നാണ് അപേക്ഷ ക്ഷണിച്ചത്. ഈ മാസം 18 നുള്ളിൽ നൽകണം. ഇന്ത്യയിൽ രൂപീകരിച്ച 26 സി.എച്ച്.ജി.ഒ (കമ്പൈൻഡ് ഹജ്ജ് ഗ്രൂപ്പ് ഓർഗനൈസേഴ്സ്) കൾ വഴിയാണ് സഊദിയിലെ താമസ, ട്രാൻസ്പോർട്ടേഷൻ ഉൾപ്പെടെയുള്ള കരാറുകൾ പൂർത്തീകരിക്കേണ്ടതും പണമടക്കേണ്ടതും. മുൻ വർഷങ്ങളിൽ കരിമ്പട്ടികയിൽ ഉൾപ്പെട്ടവർക്ക് അപേക്ഷിക്കാനാകില്ല. കേരളത്തിൽ 103 അംഗീകൃത ഹജ്ജ് ഗ്രൂപ്പ് ഓർഗനൈസർമാരുണ്ട്. സ്വകാര്യ ഗ്രൂപ്പുകൾക്കും ഹജ്ജ് പോളിസി പുറത്തിറക്കിയിട്ടുണ്ട്. രണ്ട് വർഷം മുമ്പ് സ്വകാര്യ ഗ്രൂപ്പുകൾ പണമടക്കാൻ വൈകിയതിനെ തുടർന്ന് 10,000 പേർക്ക് മാത്രമാണ് അവസരം ലഭിച്ചത്.