തിരുവനന്തപുരം: പാര്‍ട്ടിവിട്ടവരേ തിരിച്ചെടുക്കുന്നതുമായി ബന്ധപ്പെട്ട സി.പി.എം സംസ്ഥാന സെക്രട്ടേറിയറ്റ് അംഗം എം.വി. ജയരാജന്റെ പരാമര്‍ശത്തില്‍ വിശദീകരണവുമായി സി.പി.എം സംസ്ഥാന സെക്രട്ടറി എം.വി. ഗോവിന്ദന്‍. പാര്‍ട്ടിവിട്ട് പോയവര്‍ വര്‍ഗവഞ്ചകര്‍ തന്നെയാണെന്നും, എന്നാല്‍ തെറ്റ് തിരുത്തിയാല്‍ ആര്‍ക്കും കമ്മ്യൂണിസ്റ്റ് പാര്‍ട്ടിയിലേക്ക് തിരിച്ചുവരാമെന്നത് പൊതുരീതിയാണെന്നും അദ്ദേഹം വ്യക്തമാക്കി. ഓരോ നേതാവും വിവിധ ചാനലുകളില്‍ പറയുന്ന കാര്യങ്ങള്‍ക്കൊന്നും പ്രത്യേകം മറുപടി പറയേണ്ട സാഹചര്യമില്ലെന്നും എം.വി. ഗോവിന്ദന്‍ കൂട്ടിച്ചേര്‍ത്തു.

'ഇത് നേരത്തേയും പറഞ്ഞ കാര്യമാണ്. തെറ്റ് തിരുത്തിയാല്‍ ഈ ഭൂമുഖത്ത് ആര്‍ക്കും കമ്മ്യൂണിസ്റ്റ് പാര്‍ട്ടിയിലേക്ക് വരാം. പാര്‍ട്ടിയെ വഞ്ചിച്ചതാണ് അവര്‍ ചെയ്ത തെറ്റ്. അത് വര്‍ഗവഞ്ചനയും ചതിയുമാണ്. ഇക്കാര്യം പാര്‍ട്ടി കൃത്യമായി ചൂണ്ടിക്കാട്ടിയിട്ടുണ്ട്. സുധാകരനും ടി.കെ. ഗോവിന്ദനും വി. കുഞ്ഞികൃഷ്ണനും പാര്‍ട്ടിയെ വഞ്ചിച്ച് പുറത്തുപോയവരാണ്. ആ നിലപാടിനെ ശക്തമായി വിമര്‍ശിച്ചിട്ടുണ്ട്. അതിനൊപ്പം തന്നെ തെറ്റ് തിരുത്തുന്നവര്‍ക്ക് തിരികെ വരാന്‍ അവസരമുണ്ടെന്നത് എല്ലാവര്‍ക്കും ബാധകമായ പൊതുനിയമമാണ്,' എം.വി. ഗോവിന്ദന്‍ പറഞ്ഞു.

ALSO READ: കോഴിക്കോട്ട് ലഹരിവേട്ട; ഹാഷിഷ് ഓയിലും മെത്താംഫിറ്റമിനുമായി എട്ട് യുവാക്കൾ അറസ്റ്റിൽ 

തെറ്റ് തിരുത്തിയാല്‍ ടി.കെ. ഗോവിന്ദനും വി. കുഞ്ഞികൃഷ്ണനും പാര്‍ട്ടിയിലേക്ക് മടങ്ങിവരുന്നതിന് തടസ്സമില്ലെന്നായിരുന്നു എം.വി. ജയരാജന്‍ ഒരു പ്രാദേശിക ചാനലിന് നല്‍കിയ അഭിമുഖത്തില്‍ പറഞ്ഞത്. പാര്‍ട്ടിയെ വെല്ലുവിളിച്ച് പുറത്തുപോയ എം.വി. രാഘവനെയും കെ.ആര്‍. ഗൗരിയമ്മയെയും അവരുടെ അവസാനകാലത്ത് പാര്‍ട്ടി സ്വീകരിച്ചിരുന്നുവെന്നും, നയപരമായ തെറ്റുകള്‍ സംഭവിച്ചവരെ ഒറ്റപ്പെടുത്തുന്ന സമീപനമല്ല സിപിഎമ്മിനുള്ളതെന്നും അദ്ദേഹം വ്യക്തമാക്കിയിരുന്നു.

അതേ അഭിമുഖത്തില്‍ കഴിഞ്ഞ നിയമസഭാ തിരഞ്ഞെടുപ്പിലെ സ്ഥാനാര്‍ഥി നിര്‍ണയത്തെക്കുറിച്ചും എം.വി. ജയരാജന്‍ ആത്മവിമര്‍ശനം നടത്തിയിരുന്നു. അന്ന് സ്വീകരിച്ച സ്ഥാനാര്‍ഥി നിര്‍ണയത്തില്‍ പിഴവുണ്ടായെന്നും, മണ്ഡല പുനഃക്രമീകരണത്തിന് ശേഷം തളിപ്പറമ്പിന്റെ രാഷ്ട്രീയ സാഹചര്യം മാറിയിരുന്നുവെന്നും അദ്ദേഹം പറഞ്ഞു. പയ്യന്നൂരില്‍ മറ്റൊരു സ്ഥാനാര്‍ഥിയെ നിര്‍ത്തിയിരുന്നെങ്കില്‍ വിജയിക്കാമായിരുന്നുവെന്നും, തളിപ്പറമ്പിന്റെ കാര്യത്തില്‍ അത്തരമൊരു വിലയിരുത്തല്‍ നടത്താന്‍ കഴിയില്ലെന്നും അദ്ദേഹം അഭിപ്രായപ്പെട്ടു.

എം.വി. ജയരാജന്റെ ഈ പരാമര്‍ശങ്ങള്‍ക്ക് പിന്നാലെയാണ് സിപിഎമ്മിന്റെ ഔദ്യോഗിക നിലപാട് വിശദീകരിച്ച് സംസ്ഥാന സെക്രട്ടറി എം.വി. ഗോവിന്ദന്‍ രംഗത്തെത്തിയത്.

CPI(M) State Secretary M.V. Govindan has clarified the remarks made by CPI(M) State Secretariat member M.V. Jayarajan regarding taking back those who left the party.He said that those who left the party are indeed class traitors, but it is the general practice of the Communist Party that anyone who corrects their mistake can return to the party. He also added that there is no need to give separate replies to everything each leader says on various TV channels