തിരുവനന്തപുരം: യാത്രക്കാരോട് മോശമായി പെരുമാറിയെന്ന പരാതിയില്‍ തിരുവനന്തപുരം സെന്‍ട്രല്‍ ഡിപ്പോയിലെ മൂന്ന് കെ.എസ്.ആര്‍.ടി.സി ജീവനക്കാര്‍ക്കെതിരേ അന്വേഷണം. യാത്രക്കാര്‍ നല്‍കിയ പരാതിയുടെ അടിസ്ഥാനത്തില്‍ കെ.എസ്.ആര്‍.ടി.സി സി.എം.ഡി അന്വേഷണത്തിന് നിര്‍ദേശം നല്‍കി.

തിരുവനന്തപുരം സെന്‍ട്രല്‍ ഡിപ്പോയിലെ അന്വേഷണ വിഭാഗത്തില്‍ ബസുകളുടെ സമയം ചോദിച്ച യാത്രക്കാര്‍ക്ക് ജീവനക്കാര്‍ മറുപടി നല്‍കാന്‍ തയ്യാറായില്ലെന്നാണ് പരാതി. ആവര്‍ത്തിച്ച് ചോദിച്ചപ്പോഴാണ് 'ബസ് വരുമ്പോഴേ അറിയാന്‍ പറ്റൂ' എന്ന് പറഞ്ഞ് യാത്രക്കാരോട് തട്ടിക്കയറിയതെന്നും പരാതിയില്‍ പറയുന്നു.

ALSO READ: 'വിമതര്‍ വര്‍ഗവഞ്ചകര്‍ തന്നെ; തെറ്റ് തിരുത്തിയാല്‍ ആര്‍ക്കും മടങ്ങിവരാം'; ഓരോരുത്തരും പറയുന്നതിന് മറുപടി പറയാനില്ല; എം.വി. ഗോവിന്ദന്‍ 

ഡ്യൂട്ടി സമയത്ത് യാത്രക്കാര്‍ക്ക് ആവശ്യമായ വിവരങ്ങള്‍ നല്‍കുന്നതിന് പകരം ജീവനക്കാര്‍ മൊബൈല്‍ ഫോണില്‍ നോക്കി ഇരിക്കുകയായിരുന്നുവെന്നും പരാതിയില്‍ ആരോപിക്കുന്നു. അന്വേഷണ വിഭാഗത്തിലെ ജീവനക്കാര്‍ക്കെതിരേ സമാന പരാതികള്‍ നേരത്തെയും ഉയര്‍ന്നിട്ടുണ്ടെന്ന ആക്ഷേപവും നിലനില്‍ക്കുന്നു.

കണ്‍ട്രോളിംഗ് ഇന്‍സ്‌പെക്ടര്‍ അബ്ദുള്‍ ഫെയ്‌സി, സ്റ്റേഷന്‍ മാസ്റ്റര്‍ അനില്‍ കുമാര്‍, സ്റ്റേഷന്‍ മാസ്റ്റര്‍ മുഹമ്മദ് റാഫി എന്നിവര്‍ക്കെതിരേയാണ് അന്വേഷണം നടക്കുന്നത്.

സംഭവത്തില്‍ അന്വേഷണം പൂര്‍ത്തിയാക്കി ഉടന്‍ കെ.എസ്.ആര്‍.ടി.സി സി.എം.ഡിക്ക് റിപ്പോര്‍ട്ട് സമര്‍പ്പിക്കുമെന്ന് ജില്ലാ ട്രാന്‍സ്‌പോര്‍ട്ട് ഓഫീസര്‍ മനോജ് അറിയിച്ചു.

An inquiry has been ordered against three KSRTC employees from Thiruvananthapuram Central Depot over complaints of misbehaving with passengers.Based on the complaint given by passengers, the KSRTC CMD has directed that an investigation be conducted.