ന്യൂഡല്‍ഹി: രാജ്യത്ത് ഒരാള്‍ക്ക് കൈവശം വയ്ക്കാവുന്ന സ്വര്‍ണ്ണത്തിന്റെ അളവിനെക്കുറിച്ചുള്ള ചര്‍ച്ചകള്‍ വീണ്ടും സജീവമായിരിക്കുകയാണ്. കൃത്യമായ വരുമാന സ്രോതസ്സും വാങ്ങിയതിന്റെ രേഖകളും ഉണ്ടെങ്കില്‍ ഇന്ത്യയില്‍ ഒരു വ്യക്തിക്ക് എത്ര അളവ് സ്വര്‍ണ്ണം വേണമെങ്കിലും നിയമപരമായി സൂക്ഷിക്കാവുന്നതാണ്. എന്നാല്‍, കൃത്യമായ രേഖകളില്ലാതെ വീട്ടില്‍ സൂക്ഷിക്കുന്ന സ്വര്‍ണ്ണത്തിന് ആദായനികുതി വകുപ്പിന്റെ പരിശോധനകളില്‍ വ്യക്തമായ പരിധി നിശ്ചയിച്ചിട്ടുണ്ട്.

സെന്‍ട്രല്‍ ബോര്‍ഡ് ഓഫ് ഡയറക്ട് ടാക്‌സസ് (CBDT) നല്‍കുന്ന മാര്‍ഗ്ഗനിര്‍ദേശങ്ങള്‍ പ്രകാരം, റെയ്ഡ് പോലുള്ള സാഹചര്യങ്ങളില്‍ രേഖകളില്ലാതെ കൈവശം വയ്ക്കാവുന്ന സ്വര്‍ണ്ണാഭരണങ്ങളുടെ അളവ് എങ്ങനെയാണെന്നു നോക്കാം.

വിവാഹിതരായ സ്ത്രീകള്‍- 500 ഗ്രാം (ഏകദേശം 62.5 പവന്‍)

അവിവാഹിതരായ സ്ത്രീകള്‍- 250 ഗ്രാം (ഏകദേശം 31.25 പവന്‍)

പുരുഷന്മാര്‍ (വിവാഹിതരോ അവിവാഹിതരോ)- 100 ഗ്രാം (ഏകദേശം 12.5 പവന്‍)

കുടുംബത്തിന്റെ സാമൂഹിക പശ്ചാത്തലമോ വരുമാനമോ കണക്കിലെടുക്കാതെ തന്നെ, ഈ നിശ്ചിത പരിധിയിലുള്ള സ്വര്‍ണ്ണാഭരണങ്ങള്‍ പിടിച്ചെടുക്കാന്‍ ഉദ്യോഗസ്ഥര്‍ക്ക് നിയമപരമായി അധികാരമില്ല.

ഈ പരിധിയില്‍ കൂടുതല്‍ സ്വര്‍ണ്ണമുണ്ടെങ്കില്‍ എന്ത് സംഭവിക്കും?

വ്യക്തമായ ബില്ലുകളോ രേഖകളോ ഇല്ലെങ്കിലും ചില പ്രത്യേക സാഹചര്യങ്ങളില്‍ ഇളവുകള്‍ ലഭിക്കാറുണ്ട്

വെല്‍ത്ത് ടാക്‌സ് റിട്ടേണില്‍ സ്വര്‍ണ്ണത്തിന്റെ വിവരങ്ങള്‍ മുന്‍കൂട്ടി വെളിപ്പെടുത്തിയിട്ടുണ്ടെങ്കില്‍.

സ്വര്‍ണ്ണം വാങ്ങാനായി ഉപയോഗിച്ച പണത്തിന്റെ കൃത്യമായ വരുമാന സ്രോതസ്സ് തെളിയിക്കാന്‍ സാധിച്ചാല്‍.

കുടുംബ പാരമ്പര്യമോ ആചാരങ്ങളോ മുന്‍നിര്‍ത്തി ലഭിച്ചതാണെന്ന് ബോധ്യപ്പെട്ടാല്‍ കൂടുതല്‍ അളവ് അനുവദിക്കാന്‍ ഉദ്യോഗസ്ഥര്‍ക്ക് വിവേചനാധികാരമുണ്ട്.

പ്രത്യേക ശ്രദ്ധയ്ക്ക്- ഈ ഇളവുകളെല്ലാം സ്വര്‍ണ്ണാഭരണങ്ങള്‍ക്ക് മാത്രമാണ് ബാധകം. സ്വര്‍ണ്ണ നാണയങ്ങള്‍ക്കോ (Coins), ഗോള്‍ഡ് ബാറുകള്‍ക്കോ (Bars) ഈ പരിരക്ഷ ലഭിക്കില്ല. അവയ്ക്ക് കൃത്യമായ രേഖകള്‍ നിര്‍ബന്ധമാണ്.

സ്രോതസ്സ് വ്യക്തമാക്കാന്‍ കഴിഞ്ഞില്ലെങ്കില്‍ വലിയ പിഴ

കൈവശമുള്ള അധിക സ്വര്‍ണ്ണത്തിന്റെ വരുമാന സ്രോതസ്സ് തെളിയിക്കാന്‍ സാധിക്കാതെ വന്നാല്‍ വന്‍ തുക നികുതിയും പിഴയും ഒടുക്കേണ്ടി വരും. കണക്കില്‍പ്പെടാത്ത സ്വര്‍ണ്ണത്തിന് 60% നികുതി, 25% സര്‍ചാര്‍ജ്, 4% സെസ് എന്നിവയുള്‍പ്പെടെ ഏകദേശം 78% വരെ നികുതി ഈടാക്കാം. കൂടാതെ, ഈ നികുതി തുകയ്ക്ക് പുറമെ 10% അധിക പിഴയും ചുമത്താന്‍ നിയമ വ്യവസ്ഥയുണ്ട്.

According to Income Tax guidelines, individuals can hold a specific amount of undocumented gold jewelry based on gender and marital status, but exceeding these limits without proper financial sources can attract up to 78% tax and penalties.