ന്യൂഡല്‍ഹി: വയനാട് കള്ളാടിയിലുണ്ടായ മണ്ണിടിച്ചിലില്‍ കുടുങ്ങിക്കിടക്കുന്നവരേ രക്ഷിക്കാനുള്ള ശ്രമങ്ങള്‍ യുദ്ധകാലാടിസ്ഥാനത്തില്‍ പുരോഗമിക്കുകയാണെന്ന് വയനാട് എം.പി. പ്രിയങ്ക ഗാന്ധി പറഞ്ഞു. മുഖ്യമന്ത്രി വി.ഡി. സതീശന്റെ നേതൃത്വത്തില്‍ ദുരിതാശ്വാസ പ്രവര്‍ത്തനങ്ങള്‍ നേരിട്ട് ഏകോപിപ്പിക്കുകയാണെന്നും പൊലിസും എന്‍.ഡി.ആര്‍.എഫും എസ്.ഡി.ആര്‍.എഫും സിവില്‍ ഡിഫന്‍സ് സന്നദ്ധപ്രവര്‍ത്തകരും സ്ഥലത്ത് സജീവമായി പ്രവര്‍ത്തിക്കുന്നുണ്ടെന്നും അവര്‍ വ്യക്തമാക്കി.

ദുരന്തവുമായി ബന്ധപ്പെട്ട് ബന്ധപ്പെട്ട എല്ലാ ഉദ്യോഗസ്ഥരുമായും ആശയവിനിമയം നടത്തിയിട്ടുണ്ടെന്നും ജില്ലാ ഭരണകൂടം, സംഭവസ്ഥലത്തേക്ക് തിരിക്കുന്ന മന്ത്രിമാരായ ടി. സിദ്ദിഖ്, എ.പി. അനില്‍ കുമാര്‍, പ്രാദേശിക പാര്‍ട്ടി പ്രവര്‍ത്തകര്‍, മറ്റ് ഏജന്‍സികള്‍ എന്നിവരുമായി ചേര്‍ന്ന് രക്ഷാപ്രവര്‍ത്തനങ്ങള്‍ ഏകോപിപ്പിച്ചുവരികയാണെന്നും പ്രിയങ്ക ഗാന്ധി പറഞ്ഞു.

ALSO READ: വയനാട് മണ്ണിടിച്ചില്‍: രക്ഷാപ്രവര്‍ത്തനത്തിന് എല്ലാ സജ്ജീകരണങ്ങളും ഒരുക്കി; നേരിട്ട് ദുരന്ത നിവാരണ അതോറിറ്റിയിലെത്തി മുഖ്യമന്ത്രി 

ദുരന്തത്തില്‍ ജീവന്‍ നഷ്ടമായവരുടെ കുടുംബാംഗങ്ങളുടെ ദുഃഖത്തില്‍ പങ്കുചേരുന്നതായും ദുരിതബാധിതര്‍ക്കൊപ്പം ഈ പ്രയാസകരമായ ഘട്ടത്തില്‍ ഒപ്പമുണ്ടാകുമെന്നും സാധ്യമായ എല്ലാ പിന്തുണയും ഉറപ്പാക്കുമെന്നും അവര്‍ അറിയിച്ചു. മണ്ണിനടിയില്‍ കുടുങ്ങിക്കിടക്കുന്നവരെ എത്രയും വേഗം കണ്ടെത്താനാകട്ടെയെന്ന് പ്രാര്‍ഥിക്കുന്നതായും അവര്‍ കൂട്ടിച്ചേര്‍ത്തു.

അതേസമയം, ഭരണകൂടത്തിന്റെ നിര്‍ദേശങ്ങള്‍ കര്‍ശനമായി പാലിച്ചുകൊണ്ട് ദുരിതാശ്വാസ പ്രവര്‍ത്തനങ്ങളില്‍ പങ്കാളികളാകാന്‍ യു.ഡി.എഫ് പ്രവര്‍ത്തകരോടും പൊതുജനങ്ങളോടും പ്രിയങ്ക ഗാന്ധി അഭ്യര്‍ഥിച്ചു. രക്ഷാപ്രവര്‍ത്തനങ്ങള്‍ക്ക് തടസ്സമുണ്ടാകാത്ത രീതിയില്‍ മാത്രമേ സഹായങ്ങള്‍ എത്തിക്കാവൂവെന്നും ഈ ദുരന്തഘട്ടത്തില്‍ എല്ലാവരും ഒറ്റക്കെട്ടായി ദുരിതബാധിതര്‍ക്കൊപ്പം നില്‍ക്കണമെന്നും അവര്‍ ആവശ്യപ്പെട്ടു.

നേരത്തെ വയനാട് കള്ളാടിയിലെ മണ്ണിടിച്ചില്‍ ദുരന്തത്തില്‍ വിവിധ സേനകളുടെ നേതൃത്വത്തില്‍ രക്ഷാപ്രവര്‍ത്തനം പുരോഗമിക്കുകയാണെന്ന് മുഖ്യമന്ത്രി അറിയിച്ചിരുന്നു. മീനങ്ങാടിയില്‍ നിന്നുള്ള എന്‍ഡിആര്‍എഫ് സംഘം സ്ഥലത്തെത്തിയിട്ടുണ്ടെന്നും കോഴിക്കോട് നിന്നുള്ള സംഘവും ഉടന്‍ എത്തുമെന്നും അദ്ദേഹം പറഞ്ഞു. സംസ്ഥാന പൊലിസും ഫയര്‍ഫോഴ്‌സും സ്ഥലത്ത് പ്രവര്‍ത്തിക്കുന്നുണ്ടെന്നും തൃശ്ശൂരില്‍ നിന്നുള്ള ഡിഫന്‍സ് സെക്യൂരിറ്റി ഫോഴ്‌സിനെയും സജ്ജമാക്കിയിട്ടുണ്ടെന്നും മുഖ്യമന്ത്രി വ്യക്തമാക്കി. മണ്ണ് നീക്കം ചെയ്യുന്നതിനായി എട്ട് എസ്‌കവേറ്ററുകള്‍ വിന്യസിച്ചിട്ടുള്ളതിനാല്‍ ഉപകരണങ്ങളുടെയോ രക്ഷാസേനയുടെയോ കുറവുണ്ടാകില്ലെന്നും അദ്ദേഹം അറിയിച്ചു.

Wayanad MP Priyanka Gandhi said that efforts to rescue those trapped in the landslide at Kallady, Wayanad are progressing on a war footing.She also stated that relief operations are being directly coordinated under the leadership of Chief Minister V.D. Satheesan. Police, NDRF, SDRF and Civil Defence volunteers are actively working at the site, she added.