ഹൈദരാബാദ്: 2026 ലെ ഫിഫ ലോകകപ്പിൽ നിന്ന് പോർച്ചുഗൽ പുറത്തായതിന് പിന്നാലെ ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോയ്ക്ക് വികാരനിർഭരമായ ആശംസ അർപ്പിച്ച് ഇന്ത്യൻ സ്റ്റാർ പേസർ മുഹമ്മദ് സിറാജ്. കരിയറിലെ തന്റെ വലിയ പ്രചോദനമാണ് റൊണാൾഡോയെന്ന് സിറാജ് ഇൻസ്റ്റാഗ്രാമിലൂടെ വെളിപ്പെടുത്തി.

ടെക്സസിലെ ആർലിംഗ്ടണിലുള്ള ഡാളസ് സ്റ്റേഡിയത്തിൽ തിങ്കളാഴ്ച നടന്ന ആവേശകരമായ റൗണ്ട് ഓഫ് 16 മത്സരത്തിൽ യൂറോപ്യൻ കരുത്തരായ സ്പെയിനിനോട് 1-0 ന് പരാജയപ്പെട്ടാണ് പോർച്ചുഗൽ ടൂർണമെന്റിൽ നിന്ന് പുറത്തായത്. മത്സരത്തിന്റെ 91-ാം മിനിറ്റിൽ ആഴ്സണൽ താരം മൈക്കൽ മെറിനോ നേടിയ ഗോളാണ് പോർച്ചുഗലിന്റെ വിധി എഴുതിയത്. ലോകകപ്പിന് പിന്നാലെ പോർച്ചുഗൽ കോച്ച് റോബർട്ടോ മാർട്ടിനെസ് സ്ഥാനം രാജിവെക്കുകയും ചെയ്തു.

"നീ എന്നും എന്റെ പ്രചോദനം"; സിറാജ് കുറിച്ച വാക്കുകൾ

ക്രിസ്റ്റ്യാനോ റൊണാൾഡോയുടെ കടുത്ത ആരാധകനായ സിറാജ്, താരത്തിന്റെ പരാജയത്തിൽ പങ്കുചേർന്നുകൊണ്ടാണ് ഇൻസ്റ്റാഗ്രാമിൽ ഹൃദയസ്പർശിയായ കുറിപ്പ് പങ്കുവെച്ചത്.

" എന്ത് സംഭവിച്ചാലും, നീ എപ്പോഴും എന്റെ പ്രചോദനമായിരിക്കും ക്രിസ്റ്റ്യാനോ. ഒരൊറ്റ മത്സരത്തിന് ഒരിക്കലും നിങ്ങളുടെ മഹത്വത്തെ നിർവചിക്കാൻ കഴിയില്ല. ലോകമെമ്പാടുമുള്ള ദശലക്ഷക്കണക്കിന് ആളുകളെ പ്രചോദിപ്പിച്ചതിന് വലിയ നന്ദി," സിറാജ് ഇൻസ്റ്റാഗ്രാമിൽ കുറിച്ചു.

മത്സരത്തിന് മുൻപ് തന്നെ ഇത് തന്റെ അവസാന ലോകകപ്പായിരിക്കുമെന്ന് 41-കാരനായ റൊണാൾഡോ സ്ഥിരീകരിച്ചിരുന്നു. കരിയറിൽ റെക്കോർഡ് 6 ലോകകപ്പുകൾ കളിച്ചെങ്കിലും ഫുട്ബോളിലെ ഏറ്റവും വലിയ സിംഹാസനത്തിൽ മുത്തമിടാൻ ഈ ഇതിഹാസത്തിന് കഴിഞ്ഞില്ല. 2006-ൽ സെമി ഫൈനലിൽ എത്തിയതാണ് ലോകകപ്പിലെ റൊണാൾഡോയുടെ ഏറ്റവും മികച്ച പ്രകടനം.

ക്രിക്കറ്റ് മൈതാനത്തെ 'സിആർ7' (CR7) ഭ്രാന്ത്

ക്രിക്കറ്റ് ലോകത്ത് റൊണാൾഡോയോടുള്ള ആരാധന പരസ്യമായി പ്രകടിപ്പിക്കുന്ന താരങ്ങളിൽ മുന്നിലാണ് മുഹമ്മദ് സിറാജ്. മൈതാനത്ത് വിക്കറ്റ് നേട്ടങ്ങൾക്ക് ശേഷം റൊണാൾഡോയുടെ പ്രശസ്തമായ 'Siuuu' ആഘോഷം സിറാജ് പലതവണ പുനരാവിഷ്കരിച്ചിട്ടുണ്ട്.

കഴിഞ്ഞ വർഷം ഇംഗ്ലണ്ടിനെതിരായ ഓവൽ ടെസ്റ്റിൽ ഇന്ത്യയെ വിജയത്തിലേക്ക് നയിച്ച തകർപ്പൻ അഞ്ച് വിക്കറ്റ് പ്രകടനത്തിന് പിന്നിലും റൊണാൾഡോയുടെ സ്വാധീനമുണ്ടായിരുന്നുവെന്ന് സിറാജ് വെളിപ്പെടുത്തിയിരുന്നു. മത്സരദിവസം രാവിലെ 'Believe' (വിശ്വസിക്കുക) എന്ന് എഴുതിയ റൊണാൾഡോയുടെ ചിത്രം ഫോൺ വാൾപേപ്പറാക്കിയാണ് താൻ ഇറങ്ങിയതെന്നും അത് തനിക്ക് വലിയ ആത്മവിശ്വാസം നൽകിയെന്നും സിറാജ് ഓർമ്മിച്ചു.

സിറാജിന് വിശ്രമം

കഠിനമായ ക്രിക്കറ്റ് സീസണിന് ശേഷം മുഹമ്മദ് സിറാജ് ഇപ്പോൾ വിശ്രമത്തിലാണ്. കഴിഞ്ഞ മാസം അഫ്ഗാനിസ്ഥാനെതിരെ നടന്ന ഏക ടെസ്റ്റ് മത്സരത്തിലാണ് താരം അവസാനമായി ഇന്ത്യയ്ക്കായി കളിച്ചത്. ജോലിഭാരം ലഘൂകരിക്കുന്നതിന്റെ ഭാഗമായി സിംബാബ്‌വെ, ഇംഗ്ലണ്ട് പരമ്പരകളിൽ നിന്ന് സിറാജിന് വിശ്രമം അനുവദിച്ചിരിക്കുകയാണ്. വരാനിരിക്കുന്ന ഓഗസ്റ്റ് മാസത്തിൽ ശ്രീലങ്കയ്‌ക്കെതിരായ പരമ്പരയിലൂടെ താരം വീണ്ടും ടീമിലേക്ക് തിരിച്ചെത്തുമെന്നാണ് പ്രതീക്ഷിക്കുന്നത്.