ഷാർജ: സുസ്ഥിര ജീവിതശൈലി പ്രോത്സാഹിപ്പിക്കുന്നതിനും പരിസ്ഥിതി സംരക്ഷണം ഉറപ്പാക്കുന്നതിനുമായി പുതിയ കാമ്പയിന് തുടക്കം കുറിച്ച് ഷാർജ മുനിസിപ്പൽ വകുപ്പ്. ഒറ്റത്തവണ മാത്രം ഉപയോഗിക്കാവുന്ന പ്ലാസ്റ്റിക് ഉൾപ്പെടെയുള്ള ഉൽപ്പന്നങ്ങൾക്ക് പകരം പരിസ്ഥിതി സൗഹൃദ ബദലുകൾ ഉപയോഗിക്കാൻ താമസക്കാരെ പ്രോത്സാഹിപ്പിക്കുകയാണ് ഈ സംരംഭത്തിന്റെ ലക്ഷ്യം.

'ഷാർജ ഡിസേർവ്സ് ദി ബെസ്റ്റ്' (Sharjah Deserves the Best) എന്ന് പേരിട്ടിരിക്കുന്ന ഈ വിപുലമായ കാമ്പയിൻ 2026 ഡിസംബർ 31 വരെ നീണ്ടുനിൽക്കും. വ്യക്തികൾ, കുടുംബങ്ങൾ, ബിസിനസ് സ്ഥാപനങ്ങൾ എന്നിവരെ ദൈനംദിന ജീവിതത്തിൽ മാലിന്യങ്ങൾ കുറയ്ക്കാൻ പ്രേരിപ്പിക്കുന്ന രീതിയിലാണ് കാമ്പയിൻ വിഭാവനം ചെയ്തിരിക്കുന്നത്.

വിവിധ സർക്കാർ വകുപ്പുകളുടെ സഹകരണം

ഷാർജ ഗവൺമെന്റ് മീഡിയ ബ്യൂറോ, പ്രമുഖ പരിസ്ഥിതി മാനേജ്‌മെന്റ് കമ്പനിയായ ബീഅ ഗ്രൂപ്പ്, എൻവയോൺമെന്റ് ആൻഡ് പ്രൊട്ടക്റ്റഡ് ഏരിയാസ് അതോറിറ്റി (EPAA), ഷാർജ പ്രൈവറ്റ് എഡ്യൂക്കേഷൻ അതോറിറ്റി (SPEA) എന്നിവയുൾപ്പെടെ നിരവധി പ്രമുഖ സർക്കാർ സ്ഥാപനങ്ങൾ സംയുക്തമായാണ് ഈ പദ്ധതി നടപ്പിലാക്കുന്നത്.
 
കാമ്പയിനിന്റെ ഉദ്ഘാടനത്തിന്റെ ഭാഗമായി ഇമാറാത്തിലെ പ്രമുഖ ഷോപ്പിംഗ് സെന്ററുകളിൽ പുനരുപയോഗിക്കാൻ കഴിയുന്ന തുണി സഞ്ചി പോലുള്ള ബാഗുകൾ സൌജന്യമായി വിതരണം ചെയ്തു. എല്ലാ പ്രായത്തിലുമുള്ള ആളുകളെയും ഉൾപ്പെടുത്തിക്കൊണ്ടുള്ള പ്രത്യേക വിദ്യാഭ്യാസ ബോധവൽക്കരണ സെഷനുകളും ഡിജിറ്റൽ പ്രദർശനങ്ങളും ഇതിനകം ആരംഭിച്ചിട്ടുണ്ട്.

ഉപയോഗശൂന്യമായ ഉൽപ്പന്നങ്ങളെ അമിതമായി ആശ്രയിക്കുന്നത് കുറയ്ക്കാനാണ് കാമ്പയിൻ പ്രധാനമായും ലക്ഷ്യമിടുന്നതെന്ന് മുനിസിപ്പൽ വകുപ്പ് ചെയർമാൻ സുൽത്താൻ മുഹമ്മദ് ബിൻ ഹുവൈദൻ അൽ കെത്ബി പറഞ്ഞു. ഒറ്റത്തവണ ഉപയോഗിക്കുന്ന പ്ലാസ്റ്റിക് ഗ്ലാസുകൾക്കും ബാഗുകൾക്കും പകരം വീണ്ടും ഉപയോഗിക്കാവുന്ന വസ്തുക്കൾ തിരഞ്ഞെടുക്കുന്ന പോലുള്ള ഓരോ ചെറിയ മാറ്റവും ഭാവി തലമുറയ്ക്ക് പ്രയോജനപ്പെടുന്ന വലിയൊരു സന്ദേശമാണെന്ന് അദ്ദേഹം കൂട്ടിച്ചേർത്തു.

ഫീൽഡ് പ്രവർത്തനങ്ങൾ, മാധ്യമ പ്രചാരണങ്ങൾ, സ്കൂളുകൾ കേന്ദ്രീകരിച്ചുള്ള പരിപാടികൾ എന്നിവയിലൂടെ പരമാവധി ആളുകളിലേക്ക് പരിസ്ഥിതി സന്ദേശം എത്തിക്കുമെന്ന് മുനിസിപ്പൽ കാര്യ വകുപ്പ് ഡയറക്ടർ ശൈഖ് മുഹമ്മദ് ബിൻ അബ്ദുല്ല അൽ ഖാസിമി വ്യക്തമാക്കി. വികസനവും പരിസ്ഥിതി സംരക്ഷണവും ഒരുപോലെ കൊണ്ടുപോകുന്ന ഷാർജയുടെ ഹരിത കാഴ്ചപ്പാടിന്റെ ഭാഗമാണിത്.

ALSO READ: സൂപ്പർമാർക്കറ്റുകളിലെ ഷെൽഫിലെ വിലയല്ല ബില്ലിൽ! വൻ പൊരുത്തക്കേടെന്ന് പരാതി; ഉപഭോക്താക്കൾക്ക് മുന്നറിയിപ്പുമായി എമിറേറ്റ്‌സ് കൺസ്യൂമർ പ്രൊട്ടക്ഷൻ അസോസിയേഷൻ

Sharjah authorities have launched a public awareness campaign to promote compliance with restrictions on single-use plastic products, encouraging sustainable alternatives and reinforcing the emirate's environmental protection and waste reduction goals.