കൊച്ചി: ഇന്ത്യന്‍ കോളജ് ഓഫ് കാര്‍ഡിയോളജിയുടെ ദേശീയ പ്രസിഡന്റായി ഡോ.പി.കെ അശോകന്‍ ചുമതലയേറ്റു. സെപ്റ്റംബര്‍ 18ന് ഗോവയില്‍ വച്ച് നടന്ന 23ാമത് ദേശീയ സമ്മേളനത്തിലാണ് ഭാരവാഹികളെ തെരഞ്ഞെടുത്തത്.
കോഴിക്കോട് സ്വദേശിയായ ഡോ.പി.കെ അശോകന്‍ ഫാത്തിമ ഹോസ്പിറ്റലിലെ ചീഫ് കാര്‍ഡിയോളജിസ്റ്റും, മലബാര്‍ മെഡിക്കല്‍ കോളജിലെ ഫാക്കല്‍റ്റിയുമാണ്. കേരളത്തില്‍ ആദ്യമായി റേഡിയല്‍ ആന്‍ജിയോപ്ലാസ്റ്റിക്ക് തുടക്കമിട്ട ഡോ.പി.കെ അശോകന്‍ ഹൃദ്‌രോഗ ചികിത്സാരംഗത്ത് കഴിഞ്ഞ ഇരുപത് വര്‍ഷമായി പല നൂതന ചികിത്സാ രീതികളും നടപ്പിലാക്കുവാന്‍ മുന്‍കൈയെടുത്തിട്ടുണ്ട്.
ഇന്റര്‍വെന്‍ഷണല്‍ കാര്‍ഡിയോളജി ഓഫ് കേരളയുടെയും, ഇന്ത്യന്‍ കോളജ് ഓഫ് കാര്‍ഡിയോളജി കേരള ചാപ്റ്ററിന്റെയും മുന്‍ പ്രസിഡന്റാണ്. ഇന്‍ഡോ യൂറോപ്യന്‍ സംയുക്ത റീവാസ്‌കുലറൈസേഷന്‍ പാഠ്യ പദ്ധതിയുടെ കോഴ്‌സ് ഡയറക്ടര്‍ കൂടിയാണ് അദ്ദേഹം. ഇന്ത്യന്‍ കോളജ് ഓഫ് കാര്‍ഡിയോളജിയുടെ അമരക്കാരനായി ഒരു മലയാളി എത്തുന്നത് ഇത് രണ്ടാമത്തെ തവണയാണ്. എന്‍.എന്‍ ഖന്ന (ഡല്‍ഹി) വൈസ് പ്രസിഡന്റ്, ഡോ: രമേശ് (ബംഗളൂരു) ജനറല്‍ സെക്രട്ടറി എന്നിവരാണ് മറ്റ് ഭാരവാഹികള്‍.