ബെയ്ജിങ്: ടിബറ്റിലൂടെയുള്ള ബ്രഹ്മപുത്ര നദിയുടെ കൈവഴി ചൈന അടച്ചു. ബ്രഹ്മപുത്രയില്‍ ജലവൈദ്യുത പദ്ധതിക്കായി വമ്പന്‍ അണക്കെട്ട് നിര്‍മ്മിക്കുന്നതിന്റെ ഭാഗമായിട്ടാണ് ചൈനയുടെ നടപടി.

ബ്രഹ്മപുത്ര നദിയുടെ കൈവഴിയായ സിയാബു നദിയിലാണ് ലാല്‍ഹോ എന്ന് പേരിട്ടിരിക്കുന്ന പുതിയ വൈദ്യുത പദ്ധതി വരുന്നത്. സിക്കിമിനു സമീപത്തൂടെ അരുണാചല്‍ പ്രദേശിലേക്കാണ് ബ്രഹ്മപുത്ര ഒഴുകുന്നത്. അതിനാല്‍ തന്നെ ചൈനയുടെ ഈ നടപടി ഇന്ത്യയെ കാര്യമായി തന്നെ ബാധിക്കുമെന്നാണ് സിന്‍ഹുവ വാര്‍ത്താ ഏജന്‍സി റിപ്പോര്‍ട്ട് ചെയ്യുന്നത്.

ഏറെ ചെലവേറിയ ചൈനയുടെ ഈ ജലവൈദ്യുത പദ്ധതിയുടെ നിര്‍മാണം 2014 ലാണ്് ആരംഭിച്ചത്. 2019 ല്‍ നിര്‍മാണം പൂര്‍ത്തിയാവും. നിര്‍മാണം പൂര്‍ത്തിയാവുന്നതോടെ ഇന്ത്യയിലേക്കും ബംഗ്ലാദേശിലേക്കുമുള്ള ജലപ്രവാഹത്തെ ഇത് എത്രത്തോളം ബാധിക്കുമെന്ന് വ്യക്തമല്ല.

ഉറി ആക്രമത്തിന് ശേഷം പാകിസ്താനുമായുള്ള സിന്ധുനദീജല കരാര്‍ ഇന്ത്യ പുന:പരിശോധിക്കാന്‍ ആലോചിക്കുന്നതിനിടെയാണ് പാകിസ്താന്റെ അടുത്ത സുഹൃത്തായ ചൈനയുടെ ഈ നീക്കം.