നീലേശ്വരം: പടന്നക്കാട് നെഹ്‌റു ആര്‍ട്‌സ് ആന്‍ഡ് സയന്‍സ് കോളജിലെ ബി.എസ്.സി വിദ്യാര്‍ഥിനി എ.എസ് ആര്യഗോപിക ദില്ലിയില്‍ നടന്ന എന്‍.സി.സി തല്‍സൈനിക് കാംപില്‍ ഒബ്സ്റ്റക്കിള്‍ ക്രോസിങ് ഗ്രൂപ് ഇനത്തില്‍ കേരള ലക്ഷദ്വീപ് എന്‍.സി.സി ഡയരക്ടറേറ്റിനെ പ്രതിനിധീകരിച്ചു ദേശീയതലത്തില്‍ സ്വര്‍ണമെഡല്‍ നേടി. കേരളത്തിലെ വിവിധ സ്ഥലങ്ങളിലായി നടന്ന ഏഴു ദശദിന കാംപുകള്‍ക്കു ശേഷം തിരഞ്ഞെടുത്ത അഞ്ചു പേരടങ്ങുന്ന ഗ്രൂപ്പാണു ഈ ഇനത്തില്‍ കേരളത്തെ പ്രതിനിധീകരിച്ചത്. കാലിക്കറ്റ് എന്‍.സി.സി ഗ്രൂപ്പില്‍ നിന്നു ആര്യഗോപിക, ടി ലിസ്‌ന, കോട്ടയം ഗ്രൂപ്പില്‍ നിന്നു സൗമ്യ, അലീന, എറണാകുളം ഗ്രൂപ്പില്‍ നിന്നു റയ്ഹാനത്ത് എന്നിവരടങ്ങുന്ന ടീം ക്ലിയര്‍ ജംപ്, സ്‌ട്രെയ്റ്റ് ബാലന്‍സ്, ഗെയ്റ്റ് വാള്‍ട്ട്, സിങ്‌സാങ്, ഡംഡം എന്നിവയില്‍ മത്സരിച്ചാണു ഒബ്സ്റ്റക്കിള്‍ ക്രോസിങില്‍ ഒന്നാമതെത്തിയത്. നീലേശ്വരം ചായ്യോത്തെ എ.പി ഷാജി, കെ പ്രഭാവതി ദമ്പതികളുടെ മകളാണ് ആര്യ. ഇന്നു കോളജില്‍ ആര്യയ്ക്കു സ്വീകരണം നല്‍കും.