മലപ്പുറം: ശ്രീനാരായണ ഗുരുവിന്റെ നമുക്കു ജാതിയില്ല വിളംബരത്തിന്റെ നൂറാം വാര്‍ഷികത്തോടനുബന്ധിച്ചു ജില്ലയില്‍ സാംസ്‌കാരിക സദസും ഘോഷയാത്രയും നടത്തും. ഒക്‌ടോബര്‍ 22നു രാവിലെ 10 നു മലപ്പുറം നഗരസഭാ ഹാളില്‍ നടക്കുന്ന സാംസ്‌കാരിക സദസ് തദ്ദേശ സ്വയംഭരണ വകുപ്പ് മന്ത്രി ഡോ. കെ.ടി. ജലീല്‍ ഉദ്ഘാടനം ചെയ്യും. പരിപാടിയുടെ ഭാഗമായി രാവിലെ ഒന്‍പതിനു വിളംബര ഘോഷയാത്രയും നടക്കും. എം.എസ്.പി സ്‌കൂളില്‍ നിന്നും തുടങ്ങുന്ന ഘോഷയാത്രയില്‍ നഗരത്തിലെ സ്‌കൂളുകളിലെ വിദ്യാര്‍ഥികളും ജനപ്രതിനിധികളും ഉദ്യോഗസ്ഥരും അണിനിരക്കും. സാംസ്‌കാരിക വകുപ്പ്, ഇന്‍ഫര്‍മേഷന്‍ - പബ്ലിക് റിലേഷന്‍സ് വകുപ്പ്, ലൈബ്രറി കൗണ്‍സില്‍, ജില്ലാ ഭരണകൂടം, വിദ്യാഭ്യാസ വകുപ്പു തുടങ്ങിയവര്‍ സംയുക്തമായാണു പരിപാടി നടത്തുന്നത്. പരിപാടിയുടെ ഭാഗമായി തൃശൂര്‍ കലാമണ്ഡലത്തിന്റെ ആഭിമുഖ്യത്തില്‍ ഓട്ടന്‍തുള്ളലും ചാക്യാര്‍കൂത്തും അരങ്ങേറും.