ക്വാന്റന്‍: ഏഷ്യന്‍ ചാംപ്യന്‍സ് ട്രോഫി ഹോക്കിയില്‍ പാകിസ്താനെതിരേ ഇന്ത്യ തകര്‍പ്പന്‍ വിജയം സ്വന്തമാക്കി. രണ്ടിനെതിരേ മൂന്നു ഗോളുകള്‍ക്കാണ് ഇന്ത്യന്‍ വിജയം. 1-2 എന്ന നിലയില്‍ പിന്നില്‍ നിന്ന ശേഷമാണ് ഇന്ത്യ തിരിച്ചടിച്ച് വിജയിച്ചത്. രുപിന്ദര്‍ പാല്‍ സിങ്, രമണ്‍ദീപ് സിങ്, പ്രദീപ് എന്നിവരാണ് ഇന്ത്യക്കായി ഗോളുകള്‍ നേടിയത്.
യുവ സ്‌ട്രൈക്കര്‍ പ്രദീപ് കരിയറിലെ ആദ്യ അന്താരാഷ്ട്ര ഗോളിലൂടെ ഇന്ത്യക്ക് ലീഡ് സമ്മാനിച്ചു. 13 മത്സരങ്ങള്‍ക്കു ശേഷമാണ് പ്രദീപ് ആദ്യ ഗോള്‍ നേടുന്നത്. പ്രദീപിന്റെ ക്ലോസ് റേഞ്ച് ഷോട്ട് ഗോളില്‍ കലാശിക്കുകയായിരുന്നു. ആദ്യ പകുതിയില്‍ ഇന്ത്യയ്ക്കായിരുന്നു ലീഡ്. എന്നാല്‍ രണ്ടാം പകുതി തുടങ്ങി തുടക്കത്തില്‍ തന്നെ 31, 39 മിനുട്ടുകളില്‍ ഗോളുകള്‍ നേടി പാകിസ്താന്‍ ഇന്ത്യയെ സമ്മര്‍ദത്തിലാക്കി. 31ാം മിനുട്ടില്‍ മുഹമ്മദ് റിസ്‌വാനും 39ാം മിനുട്ടില്‍ മുഹമ്മദ് ഇര്‍ഫാനുമാണ് പാകിസ്താനായി ഗോളുകള്‍ നേടിയത്. 43ാം മിനുട്ടില്‍ രുപിന്ദര്‍ പാല്‍ സിങ് പെനാല്‍റ്റി കോര്‍ണറിലൂടെ ഗോള്‍ നേടി ഇന്ത്യക്ക് സമനില സമ്മാനിച്ചു. രണ്ടു മിനുട്ടിനുള്ളില്‍ കൗണ്ടര്‍ അറ്റാക്ക് നടത്തിയ ഇന്ത്യ രമണ്‍ദീപ് സിങിലൂടെ വിജയ ഗോളും കുറിച്ചു.
തല്‍വീന്ദര്‍ സിങ് നല്‍കിയ ക്രോസില്‍ നിന്നാണ് രമണ്‍ദീപ് വിജയമുറപ്പാക്കി ഗോള്‍ നേടിയത്. നാളെ നടക്കുന്ന പോരാട്ടത്തില്‍ ഇന്ത്യ ചൈനയുമായി ഏറ്റുമുട്ടും.