എളേറ്റില്‍: കൊടുവള്ളിയില്‍ കഴിഞ്ഞ യു.ഡി.എഫ് സര്‍ക്കാര്‍ അനുവദിച്ച സി.എച്ച് മുഹമ്മദ് കോയ മെമ്മോറായല്‍ ആര്‍ട്‌സ് ആന്‍ഡ് സയന്‍സ് കോളജിനു കിഴക്കോത്ത്  ഗ്രാമപഞ്ചായത്ത് സ്ഥലം കൈമാറാത്തതു സര്‍ക്കാര്‍ അനുമതി  ലഭിക്കാത്തതിനാലാണെന്ന് പഞ്ചായത്ത് പ്രസിഡന്റ് എന്‍.സി ഉസ്സയിന്‍ മാസ്റ്റര്‍ അറിയിച്ചു.
 ഈ സ്ഥലം കോളജ് എജ്യുക്കേഷന്‍ ഡയറക്ടര്‍ക്കു കൈമാറുന്നതിനു മാസങ്ങള്‍ക്കു മുന്‍പുതന്നെ സര്‍ക്കാരില്‍ അപേക്ഷ നല്‍കിയതാണ്. സി.എല്‍.എസ്.ജി.ഡി നമ്പറില്‍ തദ്ദേശ സ്വയംഭരണ വകുപ്പിനു സമര്‍പ്പിച്ച ഈ അപേക്ഷ ഉത്തരവാക്കാന്‍ എല്‍.ഡി.എഫ് സര്‍ക്കാര്‍ തയാറായില്ല.
സര്‍ക്കാരിന്റെ മെല്ലെപ്പോക്ക് നയമാണ് ഇതിനു തടസം നിന്നത്. ഗ്രാമപഞ്ചായത്തിന്റെ തനത് ഫണ്ടുപയോഗിച്ച് സ്വകാര്യവ്യക്തികളില്‍ നിന്നും വാങ്ങിയ സ്ഥലം വീണ്ടും രജിസ്‌ട്രേഷന്‍ പണമടച്ച്് മറ്റൊരു വകുപ്പിനു കൈമാറാന്‍  അനുമതിയില്ലാത്തതിനാല്‍ പ്രസ്തുത രജിസ്‌ട്രേഷന്‍ ഫീസില്‍ ഇളവ് അനുവദിക്കാന്‍ സര്‍ക്കാരില്‍ അപേക്ഷ നല്‍കിയിട്ടുണ്ട്.
സര്‍ക്കാരിന്റെ അനാസ്ഥ മറച്ചുവയ്ക്കാനാണ് ചില രാഷ്്ട്രീയ പാര്‍ട്ടികള്‍ പഞ്ചായത്തിന്റെ പേരില്‍ ആരോപണം ഉന്നയിക്കുന്നതെന്നും അദ്ദേഹം  പറഞ്ഞു.