പൂനെ: ഇന്ത്യന്‍ സൂപ്പര്‍ ലീഗില്‍ പൂനെ എഫ്.സിയുടെ മലയാളി യുവതാരം ആഷിഖ് കുരുണിയന്‍ സ്പാനിഷ് ലാ ലിഗയിലേക്ക്. വിയ്യാറലിന്റെ സി ടീമില്‍ വായ്പാടിസ്ഥാനത്തിലാണ് താരം കളിക്കുക. ഇതാദ്യമായാണ് ഒരിന്ത്യന്‍ താരം സ്പാനിഷ് ലീഗില്‍ കളിക്കുന്നത്. പൂനെയും വിയ്യാറലും തമ്മിലുള്ള ട്രയല്‍ കം ട്രെയ്‌നിങിന്റെ ഭാഗമായുള്ള കരാറിനെ തുടര്‍ന്നാണ് ആഷിഖ് ലാ ലിഗയില്‍ പന്തു തട്ടുന്നത്.
നേരത്തെ ഇന്ത്യയുടെ അണ്ടര്‍ 19 ടീമിലും എ.എഫ്.സി അണ്ടര്‍ 19 ചാംപ്യന്‍ഷിപ്പിലും ആഷിഖ് കളിച്ചിട്ടുണ്ട്. ചാംപ്യന്‍സ് ട്രോഫിയില്‍ നേടിയ തകര്‍പ്പന്‍ ഗോളാണ് ആഷിഖിനെ പ്രശസ്തനാക്കിയത്. തന്നെ സംബന്ധിച്ച് സ്വപ്നസാക്ഷാത്കാരമാണ് ഇതെന്ന് ആഷിഖ് പറഞ്ഞു. ഇത്രയും കാലം ഈ ക്ലബുകളുടെ മത്സരങ്ങള്‍ ദൂരെ നിന്ന് മാത്രം കണ്ടിട്ടുള്ളയാളാണ് താന്‍. ഇപ്പോള്‍ അതിലൊന്നില്‍ മത്സരിക്കാന്‍ അവസരം ലഭിക്കുന്നു.
പൂനെയോട് വിയ്യാറലിനോടും ഈ അവസരം നല്‍കിയതില്‍ നന്ദി പറയുന്നുവെന്ന് താരം വ്യക്തമാക്കി. അതേസമയം പൂനെ ടീമിന്റെ സി.ഇ.ഒ ഗൗരവ് മോഡ്‌വെല്‍ ആഷിഖിനെ അഭിനന്ദിച്ചു. ആഷിഖ് വമ്പന്‍ ക്ലബുകള്‍ക്കായി കളിക്കാന്‍ കെല്‍പ്പുള്ള താരമാണ്. സ്‌പെയിനില്‍ ദീര്‍ഘകാലം തുടരാന്‍ അദ്ദേഹത്തിന് സാധിക്കും. കരാര്‍ കാലാവധി വര്‍ധിപ്പിക്കാനും വിയ്യാറലിന്റെ ഒന്നാം നിര ടീമില്‍ കളിക്കാന്‍ അവസരം ലഭിക്കുമെന്നും പ്രതീക്ഷയുണ്ടെന്നും മോഡ്‌വെല്‍ പറഞ്ഞു.
വിയ്യാറല്‍ പ്രസിഡന്റ് ഫെര്‍ണാണ്ടോ റോഗും ലാ ലിഗ പ്രസിഡന്റ് ഹാവിയര്‍  ടെബാസും പുതിയ നീക്കത്തെ അഭിനന്ദിച്ചിട്ടുണ്ട്. ഇന്ത്യയിലെ കഴിവുറ്റ താരത്തെ കണ്ടെത്താനുള്ള നീക്കത്തിന്റെ ആദ്യ ഘട്ടമാണ് ഇതെന്നും. ഫുട്‌ബോളില്‍ ഇന്ത്യക്ക് മുന്‍നിരയിലേക്ക് വളര്‍ന്നു വരാനാവുമെന്നും ടെബാസ് വ്യക്തമാക്കി.