പരപ്പനങ്ങാടി: ഓട്ടോറിക്ഷയില്‍നിന്നു കിട്ടിയ രണ്ടു പവന്റെ സ്വര്‍ണമാല ഉടമസ്ഥയെ കണ്ടെത്തി തിരച്ചേല്‍പ്പിച്ച ഓട്ടോ ഡ്രൈവര്‍ മാതൃകയായി. ആനങ്ങാടി സ്റ്റാന്‍ഡിലെ ഡ്രൈവറായ ഹീറോസ് നഗറിലെ പീച്ചാന്‍ വീട്ടില്‍ സെയ്തലവിയാണ് സ്വര്‍ണം തിരിച്ചുനല്‍കിയത്.
കഴിഞ്ഞ മാസം 30നാണ് ഓട്ടത്തിനിടയില്‍ മാല കിട്ടിയത്. പിന്നീട് സ്വര്‍ണം കിട്ടിയ വിവരം ആനങ്ങാടി ടൗണില്‍ ഫ്‌ളക്‌സ് ബോര്‍ഡില്‍ എഴുതി പതിപ്പിക്കുകയായിരുന്നു സൈതലവി. മറ്റൊരാള്‍ വഴി വിവരമറിഞ്ഞത്തിയ ഉടമസ്ഥയായ ആനങ്ങാടിയിലെ പാണ്ടി ബീവാത്തുവിനു പരപ്പനങ്ങാടി പൊലിസ് സ്റ്റേഷനില്‍വച്ച് എസ്.ഐ കെ.ജെ ജിനേഷിന്റെ സാനിധ്യത്തില്‍ കൈമാറുകയായിരുന്നു.