മാവൂര്‍: കാട്ടുപന്നികളുടെ വിളയാട്ടത്തില്‍ തെങ്ങിലക്കടവ് പ്രദേശത്ത് വ്യാപക കൃഷിനാശം. തെങ്ങിലക്കടവ് വി.പി അബൂബക്കര്‍, ആയംകുളം ഹരിദാസന്‍, വില്ലേരി കൊയ്‌ലോത്ത് ബാലഗോപാലന്‍ എന്നിവരുടെ കര്‍ഷകരുടെ നേന്ത്രവാഴ, ചേമ്പ്, കപ്പ, ചേന തുടങ്ങിയ കൃഷിയാണ് വ്യാപകമായി നശിപ്പിക്കപ്പെട്ടത്. തെങ്ങിലക്കടവിന് പുറമെ അമ്പലത്താഴം, ആമ്പിലേരി തുടങ്ങിയ സ്ഥലങ്ങളിലും കാട്ടുപന്നികള്‍ കൃഷി നശിപ്പിച്ചിട്ടുണ്ട്.
തെങ്ങിലക്കടവില്‍ പൂട്ടിക്കിടക്കുന്ന മലബാര്‍ കാന്‍സര്‍ ഇന്‍സ്റ്റിറ്റ്യൂട്ട് പരിസരം കാട്ടുപന്നികളുടെ വിഹാരകേന്ദ്രമാണ്. നേരത്തെ വെള്ളലശ്ശേരി, അരയങ്കോട് ആലിന്‍ചുവട് തുടങ്ങിയ സ്ഥലങ്ങളിലും കാട്ടുപന്നികളുടെ ശല്യമുണ്ടായിരുന്നു. കാട്ടുപന്നികള്‍ കൃഷി നശിപ്പിക്കുന്നത് പ്രകൃതിക്ഷോഭത്തിന്റെ പട്ടികയില്‍പ്പെടുത്താത്തിനാല്‍ യാതൊരുവിധ നഷ്ടപരിഹാരവും ലഭിക്കാറില്ലെന്നത് കര്‍ഷകരെ കൂടുതല്‍ ദുരിതത്തിലാക്കുകയാണ്.