ആലപ്പുഴ: മഹാരാഷ്ട്രക്കെതിരായ കൂച്ച് ബിഹാര്‍ ട്രോഫി മത്സരത്തിന്റെ ആദ്യ ദിനത്തില്‍ കേരളത്തിനു മുന്‍തൂക്കം. മഹാരാഷ്ട്രയുടെ ആദ്യ ഇന്നിങ്‌സ് വെറും 78 റണ്‍സില്‍ അവസാനിപ്പിച്ച കേരളം ആദ്യ ദിനം കളി നിര്‍ത്തുമ്പോള്‍ അഞ്ചു വിക്കറ്റ് നഷ്ടത്തില്‍ 183 റണ്‍സെന്ന നിലയില്‍. അഞ്ചു വിക്കറ്റുകള്‍ കൈയിലിരിക്കേ കേരളത്തിനു 105 റണ്‍സ് ലീഡ്.
ടോസ് നേടി ബാറ്റിങ് തിരഞ്ഞെടുത്ത മഹാരാഷ്ട്രയ്ക്ക് പിഴച്ചു. മൂന്നു വീതം വിക്കറ്റുകള്‍ വീഴ്ത്തിയ നായകന്‍ സിജോമോന്‍ ജോസഫ്, ഡാരിയല്‍ എസ് ഫെരാരിയോ എന്നിവരുടെ ബൗളിങ് മഹാരാഷ്ട്രയെ വീഴ്ത്തി.
വിവേക് കെ.എസ് രണ്ടും ഫനൂസ്, ഉണ്ണിമോന്‍ സാബു എന്നിവര്‍ ഓരോ വിക്കറ്റും വീഴ്ത്തി. 28 റണ്‍സെടുത്ത അതര്‍വ കലെയാണ് മഹാരാഷ്ട്രയുടെ ടോപ് സ്‌കോറര്‍. പവന്‍ ഷ (16), ഋഷികേശ് മൊക്തര്‍ (14) എന്നിവരും രണ്ടക്കം കടന്നു. മറ്റൊരാള്‍ക്കും പിടിച്ചു നില്‍ക്കാന്‍ സാധിച്ചില്ല. അവരുടെ പോരാട്ടം 41.2 ഓവറില്‍ 78 റണ്‍സില്‍ അവസാനിച്ചു.
അശ്വിന്‍ ആനന്ദ് (71), രോഹന്‍ എസ് കുന്നുമ്മല്‍ (43), ഡാരിയല്‍ എസ് ഫെരാരിയോ (പുറത്താകാതെ 49) എന്നിവരുടെ മികവില്‍ കേരളം പോരാട്ടം മഹാരാഷ്ട്ര ക്യാംപിലേക്ക് നയിച്ചു. കളി അവസാനിക്കുമ്പോള്‍ ഡാരിയല്‍ ഫെരാരിയോക്കൊപ്പം 11 റണ്‍സുമായി ഉണ്ണിമോന്‍ സാബു ക്രീസില്‍.