ചെറുതുരുത്തി: ചേലക്കര നിയോജക മണ്ഡലത്തില്‍ നിന്ന് വിജയിച്ച യു.ആര്‍ പ്രദീപ് നിയമസഭയിലെത്തുന്നത് പഞ്ചായത്ത് മെമ്പര്‍ സ്ഥാനത്ത് നിന്ന്. ദേശമംഗലം പഞ്ചായത്തിലെ നാലാം വാര്‍ഡായ പല്ലൂര്‍ ഈസ്റ്റ് വാര്‍ഡില്‍ നിന്നാണ് പ്രദീപ് പഞ്ചായത്ത് ഭരണ സമിതിയിലേക്ക് തെരഞ്ഞെടുക്കപ്പെട്ടത്.
നേരത്തെ ദേശമംഗലം പഞ്ചായത്ത് പ്രസിഡന്റ്, വൈസ് പ്രസിഡന്റ് എന്നീ നിലകളില്‍ ശ്രദ്ധേയമായ പ്രവര്‍ത്തനം നടത്തിയിട്ടുണ്ട് പ്രദീപ്. ദേശമംഗലം സര്‍വീസ് സഹകരണ ബാങ്കിന്റെ പ്രസിഡന്റായും പ്രവര്‍ത്തിച്ചിട്ടുണ്ട് പ്രദീപ്. എം.എല്‍.എയായതോടെ ഈ വാര്‍ഡില്‍ ഉപതെരഞ്ഞെടുപ്പിനും കളമൊരുങ്ങുകയാണ്. കഴിഞ്ഞ തെരഞ്ഞെടുപ്പില്‍ 35 വോട്ടുകള്‍ക്കാണ് പ്രദീപ് വിജയിച്ചത്. ്രപദീപിന് 486 വോട്ട് ലഭിച്ചപ്പോള്‍ എതിര്‍ സ്ഥാനാര്‍ഥിയായിരുന്ന കെ.പ്രേമന്‍ 449 വോട്ട് നേടി. പ്രദീപിന്റെ വിജയം ദേശമംഗലത്തിന് അഭിമാന നിമിഷം സമ്മാനിക്കുകയാണ്. കൊണ്ടയൂര്‍ പല്ലൂര്‍ തെക്കേ പുരയ്ക്കല്‍ രാമന്‍ - ശാന്ത ദമ്പതികളുടെ മകനായ പ്രദീപ് ചെന്നൈ ഡിഫന്‍സ് സ്‌കൂളില്‍ പ്ലസ്ടു വരെ പഠിച്ചു. തപാല്‍ കോഴ്‌സിലൂടെ ബി.ബി.എ ബിരുദം കരസ്ഥമാക്കി. പട്ടാളത്തില്‍ ജോലിയെന്ന സ്വപ്നം വേണ്ടെന്ന് വെച്ചാണ് രാഷ്ട്രീയക്കാരനായത്.
വിദ്യാഭ്യാസ കാലത്ത് എസ്.എഫ്.ഐയുടെ സജീവ പ്രവര്‍ത്തകനായിരുന്നു. 2000 ത്തില്‍ സി.പി.എം അംഗമായി. നിലവില്‍ പട്ടിക ജാതി ക്ഷേമ സമിതിയുടെ ചേലക്കര ഏരിയാ സെക്രട്ടറിയും, ജില്ലാ കമ്മിറ്റി അംഗവുമാണ്.