സുല്‍ത്താന്‍ ബത്തേരി: നൂല്‍പുഴയിലെ കാര്യമ്പാടി പുഴയോരത്ത് താമസിക്കുന്ന കുടുംബങ്ങള്‍ കുടിവെള്ളത്തിനായി നെട്ടോട്ടത്തില്‍. പഞ്ചായത്തിലെ 13-ാം വാര്‍ഡിലെ 13-ഓളം കുടുംബങ്ങളാണ് കുടിവെള്ളമില്ലാതെ ദുരിതമനുഭവിക്കുന്നത്. പുഴ കടന്ന് കിലോമീറ്ററോളം സഞ്ചരിച്ച് തലചുമടായാണ് കുടിവെള്ളം എത്തിക്കുന്നത്. സ്വകാര്യ വ്യക്തിയുടെ കിണറ്റില്‍ നിന്നാണ് വെള്ളം എടുക്കുന്നത്. കോളനിയിലെ ഒരുവീട്ടില്‍ കിണറുണ്ടെങ്കിലും ഇതു വറ്റിതുടങ്ങിയതാണ് കോളനിക്കാര്‍ക്ക് ദുരിതമായത്. കുടിവെള്ളത്തിനായി മറ്റൊരു കിണര്‍ കുഴിച്ചുവെങ്കിലും ഇതിലും വെള്ളം ലഭിച്ചില്ല. കോളനിയില്‍ കിണറോ, കുഴല്‍ക്കിണറോ നിര്‍മിക്കണമെന്ന് നിരവധി തവണ അധികൃതരോട് ആവശ്യപെട്ടുവെങ്കിലും നടപടിയുണ്ടായില്ലെന്നാണ് കോളനിക്കാര്‍ പറയുന്നത്.