കാഞ്ഞങ്ങാട്: അജാനൂര്‍ പഞ്ചായത്ത് 16-ാം വാര്‍ഡ് പ്രസിഡന്റ് സി.എച്ച് ഹംസയെ പേര് ചോദിച്ച് മര്‍ദിച്ച് അവശനാക്കിയ കേസിലുള്‍പ്പെടെ നിരവധി കേസുകളില്‍ പ്രതികളായ രണ്ട് സി.പി.എം പ്രവര്‍ത്തകര്‍ അറസ്റ്റിലായി. വെള്ളിക്കോത്ത് വീണച്ചേരിയിലെ പി. ബിജു, ആലിങ്കാലിലെ കെ.വി സുരേഷ് എന്നിവരെയാണ് ഹൊസ്ദുര്‍ഗ് എസ്.ഐ പി.വി ശിവദാസന്‍ ഉള്‍പ്പടെയുള്ള സംഘം അറസ്റ്റ് ചെയ്തത്. അജാനൂര്‍ പഞ്ചായത്ത് 16-ാം വാര്‍ഡ് പ്രസിഡന്റ് സി.എച്ച് ഹംസയെ പേര് ചോദിച്ച് മര്‍ദിച്ച് അവശാനാക്കുകയും 13500 രൂപ തട്ടിയെടുക്കുകയും ചെയ്ത കേസിനു പുറമേ മറ്റു ചില കേസുകളിലും ഇവര്‍ പ്രതികളാണ്. ബി.ജെ.പി അനുഭാവി സുലോചനയുടെ വെള്ളിക്കോത്തെ ടൈലറിങ് ഷോപ്പിന് തീയിട്ട കേസിലും വെള്ളിക്കോത്തെ വിജയന്റെ തക്ഷശില ചിത്ര പഠന കേന്ദ്രവും അഗ്‌നിക്കിരയാക്കിയ കേസിലും ഇരുവരും പ്രതികളാണ്. ഈ കേസുകളില്‍ ചോദ്യം ചെയ്ത സമയത്താണ് ഇരുവരും പല ആക്രമ കേസുകളിലും പ്രതികളായിരുന്നുവെന്ന കാര്യം പൊലിസിനോട് പറഞ്ഞതെന്നാണ് സൂചന. ഹംസയെ ആക്രമിച്ച സംഭവത്തില്‍ പ്രതികളെ പിടികൂടാത്തതിനെ തുടര്‍ന്ന് പ്രക്ഷോഭ സമരങ്ങള്‍ ആരംഭിക്കാനൊരുങ്ങുന്നതിനിടയിലാണ് പ്രതികള്‍ പിടിയിലായത്. നിയമസഭാ വോട്ടണ്ണല്‍ ദിവസമാണ് ബി.ജെ.പി അനുഭാവി സുലോചനയുടെ തയ്യല്‍ കട അഗ്‌നിക്കിരയാക്കിയത്.സ്ഥാപനത്തിലുണ്ടായിരുന്ന മുഴുവന്‍ വസ്ത്രങ്ങളും അന്ന് കത്തിനശിച്ചിരുന്നു.