ചെര്‍ക്കള: അതിര്‍ക്കുഴി ജി.എല്‍.പി.എസ് സ്‌കൂള്‍ പരിസരത്ത് വെയിലേറ്റു തിളച്ചിരുന്ന ഒന്നര ഏക്കര്‍ പാറപ്പുറത്തു ഇന്നു വിളയുന്നതു വെണ്ടയും പാവലും ചീരയുമുള്‍പ്പെടെയുള്ള പച്ചക്കറികള്‍. ഉച്ചഭക്ഷണത്തിനുള്ള വിഷമില്ലാത്ത പച്ചക്കറിഈ തോട്ടത്തില്‍ നിന്നാണ് ഇവര്‍ക്കു ലഭിക്കുന്നത്. ചെങ്കള പഞ്ചായത്തിന്റെയും കൃഷി വകുപ്പിന്റെയും സഹായത്തോടെയാണ് മണ്ണിട്ടു നികത്തിയ സ്ഥലം കൃഷിക്കനുയോജ്യമാക്കിയെടുത്തത്. അഞ്ചു വര്‍ഷമായി തുടരുന്ന കൃഷിയില്‍ ആദ്യഘട്ടമെന്നോണം തെങ്ങ്, വാഴ എന്നിവ നട്ടു പിടിപ്പിച്ചു. ശേഷം സ്‌കൂള്‍ മാനേജ്‌മെന്റ് കമ്മിറ്റിയംഗമായ പരമേശ്വരന്‍ നായ്ക്കിന്റെയും പ്രധാനധ്യാപകന്‍ സച്ചിന്റെയും സഹായത്തോടെ കൃഷി വകുപ്പില്‍ നിന്നു ലഭിച്ച കോളിഫ്‌ളവര്‍, കാബേജ്, വെണ്ട, വഴുതനങ്ങ, കോവയ്ക്കാ, തുടങ്ങിയ പച്ചക്കറിവിത്തുകളും കൃഷിക്കായിറക്കി.
പി.ടി.എയുടെയും നാട്ടുകാരുടെയും സഹകരണം കൂടിയായപ്പോള്‍ കൃഷിത്തോട്ടം പടര്‍ന്നു പന്തലിച്ചു. ഈ വര്‍ഷം ഇതിനോടകം ആറര ക്വിന്റലോളം വിളവെടുത്ത സ്‌കൂളിനു കഴിഞ്ഞ മൂന്നു വര്‍ഷമായി സംസ്ഥാനതലത്തില്‍ കൃഷി വകുപ്പു നല്‍കി വരുന്ന ഊര്‍ജിത പച്ചക്കറി വികസന അവാര്‍ഡ് ഈ കൃഷിക്കുള്ള അംഗീകാരമാണ്. കഴിഞ്ഞ ദിവസം സ്‌കൂളില്‍ നടന്ന ശീതകാല പച്ചക്കറി വിളവെടുപ്പ് കാസര്‍കോട് പ്രിന്‍സിപ്പല്‍ കൃഷി ഓഫിസര്‍ പി പ്രദീപ് ഉദ്ഘാടനം ചെയ്തു. പരിസ്ഥിതി സൗഹൃദ ക്ലാസും നെല്‍വിത്തു പ്രദര്‍ശനവും ഇതോടൊപ്പം സംഘടിപ്പിച്ചു.