മാറഞ്ചേരി: നിര്‍മാണം പൂര്‍ത്തിയായി മൂന്നു മാസം കഴിഞ്ഞിട്ടും മാറഞ്ചേരി ഗ്രാമപഞ്ചായത്തിലെ പതിനഞ്ചാം വാര്‍ഡിലെ 117 ാം നമ്പര്‍ അങ്കണവാടി കെട്ടിടത്തിന്റെ ഉദ്ഘാടനം നീളുന്നു. മാറഞ്ചേരി ഗ്രാമപഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തി ജനകീയ കമ്മിറ്റിയുടെ നേതൃത്വത്തിലാണ് ഈ അങ്കണവാടി നിര്‍മാണം പൂര്‍ത്തിയാക്കിയത്.പത്തു ലക്ഷം രൂപ പദ്ധതിയില്‍ വകയിരുത്തിയിരുന്നെങ്കിലും നിര്‍മാണം പൂര്‍ത്തിയായപ്പോള്‍ ഒന്‍പതു ലക്ഷം രൂപയോളം മാത്രമാണ് ചെലവായത്. സ്വകാര്യ വ്യക്തി സൗജന്യമായി നല്‍കിയ നാല് സെന്റ് സ്ഥലത്താണ് കെട്ടിടം. മൂന്നു വര്‍ഷമായി അങ്കണവാടി പ്രവര്‍ത്തിക്കുന്നത് സമീപത്തെ മദ്‌റസാ കെട്ടിടത്തിലാണ്.
കഴിഞ്ഞ നവംബര്‍ 19ന് അങ്കണവാടിയുടെ പുതിയകെട്ടിടത്തിന്റെ ഉദ്ഘാടനം പ്രഖ്യാപിക്കുകയും ഇതിനിടയില്‍ ഉദ്ഘാടകനെ സംബന്ധിച്ചുള്ള തര്‍ക്കത്തെ തുടര്‍ന്നു മാറ്റുകയുമായിരുന്നു. പുതിയ കെട്ടിടത്തിന്റെ ഉദ്ഘാടനം കഴിഞ്ഞാല്‍ കുട്ടികളെ പറഞ്ഞയക്കാമെന്നു ചില രക്ഷിതാക്കള്‍ തീരുമാനമെടുത്തതോടെ പന്ത്രണ്ട് കുട്ടികള്‍ മാത്രം പഠിക്കുന്ന ഈ അങ്കണവാടിയിലേക്ക് കുട്ടികളുടെ വരവും അഞ്ചില്‍ താഴെയായി. 31നകം കെട്ടിടം ഉദ്ഘാടനം ചെയ്യാനാകുമെന്ന പ്രതീക്ഷയുണ്ടെന്ന് വാര്‍ഡംഗം പി. മണികണ്ഠന്‍ പറഞ്ഞു.