കായംകുളം: ദേശീയപാത മുറിച്ചുകടക്കാന്‍ ശ്രമിക്കുന്നതിനിടയില്‍ സ്‌കൂട്ടര്‍ യാത്രക്കാരിയായ യുവതിക്ക് ബസ് ഇടിച്ച് പരുക്ക്. പുതുപ്പള്ളി വൃന്ദാവനത്തില്‍ ശ്രീധരന്റെ മകള്‍ സരിഗ (22)യ്ക്കാണു പരുക്കേറ്റത്.
ഇവരെ താലൂക്കാശുപത്രിയില്‍ പ്രവേശിപ്പിച്ചു. ഇന്നലെ രാവിലെ എട്ടുമണിയോടെ കമലാലയം ജങ്ഷനിലായിരുന്നു അപകടം.
സരിഗ പുതുപ്പള്ളി റോഡില്‍നിന്നും സ്‌കൂട്ടര്‍ ദേശീയപാതയിലേക്ക് ഓടിച്ചുകയറ്റുന്നതിനിടയില്‍ തിരുവനന്തപുരത്തേക്ക് പോകുകയായിരുന്ന സൂപ്പര്‍ ഫാസ്റ്റുമായി കൂട്ടിയിടിക്കുകയായിരുന്നു.
ഇടിയുടെ ആഘാതത്തില്‍ സരിഗ റോഡിലേക്ക് തെറിച്ചുവീണു.
ബസിന് വേഗത കുറവായിരുതിനാലും ബ്രേക്ക് ചെയ്തതിനാലും വന്‍ ദുരന്തം ഒഴിവായി.റോഡിലേക്ക് തെറിച്ചുവീണ് തലക്കു പരുക്കേറ്റ സരിഗയെ ഹോംഗാര്‍ഡും നാട്ടുകാരും ചേര്‍ന്ന് താലൂക്കാശുപത്രിയില്‍ എത്തിച്ചു.
അപകട മേഖലയായ കമലാലയം ജങ്ഷനില്‍ നിത്യേന നിരവധി അപകടങ്ങളാണ് ഉണ്ടാകുന്നത്.
തിരക്കേറിയതും നാലുഭാഗത്തേക്കും വാഹനങ്ങള്‍ തിരിയുന്നതുമായ ഈ ജങ്ഷനില്‍ സിഗ്നല്‍ ലൈറ്റ് സ്ഥാപിക്കുമെന്ന് അധികൃതര്‍ പറഞ്ഞെങ്കിലും നടപടി ആയില്ല.