ബെയ്ജിങ്: ബൊക്ക ജൂനിയേഴ്‌സിന്റെ അര്‍ജന്റീന സ്‌ട്രൈക്കര്‍ കാര്‍ലോസ് ടെവസ് റെക്കോര്‍ഡ് തുകയ്ക്ക് ചൈനീസ് സൂപ്പര്‍ ലീഗ് ടീം ഷാങ്ഹായ് സിനുഹയില്‍. ഏതാണ്ട് 41 കോടി ഡോളറുകള്‍ക്കാണ് താരത്തെ ഒരു വര്‍ഷ കരാറില്‍ ചൈനീസ് ടീം സ്വന്തമാക്കിയത്. ക്രിസ്റ്റ്യാനോ റൊണാള്‍ഡോയേയും ലയണല്‍ മെസ്സിയേയും പിന്തള്ളി ലോകത്ത് ഏറ്റവും കൂടുതല്‍ പ്രതിഫലം വാങ്ങുന്ന താരമായും ഇതോടെ ടെവസ് മാറി.
സിനുഹയുടെ നാട്ടിലെ പ്രധാന എതിരാളികളായ ഷാങ്ഹായ് എസ്.ഐ.പി.ജി ദിവസങ്ങള്‍ക്ക് മുന്‍പ് ചെല്‍സിയില്‍ നിന്നു ബ്രസീല്‍ താരം ഓസ്‌കാറിനെ ടീമിലെത്തിച്ചിരുന്നു. ഇതിനു പിന്നാലെയാണ് സിനുഹ ടെവസിനെ സ്വന്തമാക്കിയത്. ബ്രസീലിയന്‍ താരങ്ങളായ ഹള്‍ക്ക്, റാമിറെസ്, പൗലീഞ്ഞോ, കൊളംബിയന്‍ താരം ജാക്‌സന്‍ മാര്‍ട്ടിനസ്, അര്‍ജന്റീന താരം ഇസക്കിയേല്‍ ലാവേസി എന്നിവര്‍ക്ക് പിന്നാലെ ടെവസും ചൈനീസ് ലീഗിലേക്ക് കൂടുമാറി. മാഞ്ചസ്റ്റര്‍ യുനൈറ്റഡ്, മാഞ്ചസ്റ്റര്‍ സിറ്റി, യുവന്റസ് ടീമുകള്‍ക്കായി കളിച്ചിട്ടുള്ള താരമാണ് 32 കാരനായ ടെവസ്.
സണ്ടര്‍ലാന്‍ഡ്, റയല്‍ ബെറ്റിസ് ടീമുകളെ പരിശീലിപ്പിച്ച ഗസ് പയറ്റാണ് നിലവില്‍ സിനുഹയുടെ പരിശീലകന്‍. ബ്രസീലിനു ലോകകപ്പ് സമ്മാനിച്ച ലൂയീസ് ഫിലിപ്പ് സ്‌കൊളാരി, മുന്‍ ചെല്‍സി കോച്ച് ആന്ദ്രെ വില്ലാസ് ബോവാസ്, മുന്‍ മാഞ്ചസ്റ്റര്‍ സിറ്റി കോച്ച് മാനുവല്‍ പെല്ലഗ്രിനി തുടങ്ങിയവരും നിലവില്‍ വിവിധ ചൈനീസ് ടീമുകളെ പരിശീലിപ്പിക്കുന്നുണ്ട്.