വടക്കാഞ്ചേരി: രാജ്യത്തെ കുത്തക മുതലാളിമാരെ സംരക്ഷിക്കാന്‍ കോടി കണക്കിന് വരുന്ന പട്ടിണി പാവങ്ങളെ ഒറ്റിക്കൊടുത്ത പ്രധാനമന്ത്രിയെന്ന പേരിലാണ് ചരിത്രം നരേന്ദ്രമോദിയെ രേഖപ്പെടുത്തുകയെന്ന് അനില്‍ അക്കര എം.എല്‍.എ പറഞ്ഞു.
കേന്ദ്ര സര്‍ക്കാരിന്റെ ഏറ്റവും ബുദ്ധിശൂന്യമായ തീരുമാനമാണ് നോട്ട് നിരോധനം. ഇത് പാവപ്പെട്ട ജനങ്ങളോടുള്ള തികഞ്ഞ വെല്ലുവിളിയാണ്. 60 വര്‍ഷം കൊണ്ട് പടുത്തുയര്‍ത്തിയ ഇന്ത്യന്‍ സമ്പദ് വ്യവസ്ഥയെ ഒറ്റ രാത്രി കൊണ്ട് മോദി തകര്‍ത്തെറിഞ്ഞതായും അനില്‍ ആരോപിച്ചു.
നോട്ട് പ്രതിസന്ധി പരിഹരിക്കാന്‍ പ്രധാനമന്ത്രി ആവശ്യപ്പെട്ട 50 ദിനം പൂര്‍ത്തിയായിട്ടും പ്രതിസന്ധി ശമനമില്ലാതെ തുടരുന്ന സാഹചര്യത്തില്‍ വടക്കാഞ്ചേരി ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തില്‍ മോദിയെ വിചാരണ ചെയ്യുന്ന ചടങ്ങ് ഉദ്ഘാടനം ചെയ്തു കൊണ്ട് സംസാരിക്കുകയായിരുന്നു അനില്‍ അക്കര.
ജിജോ കുരിയന്‍ അധ്യക്ഷനായി. കെ.അജിത്കുമാര്‍, എന്‍.ആര്‍ സതീശന്‍, എന്‍.എ സാബു, എ.ജെ ഷാജു, എസ്.എ.എ ആസാദ്, ടി.വി സണ്ണി, പി.വി നാരായണസ്വാമി, തോമാസ് പുത്തൂര്‍, വേണുഗോപാല്‍, ജയന്‍ മംഗലം, കെ.ആര്‍ കൃഷ്ണന്‍കുട്ടി, സി.എ ശങ്കരന്‍ കുട്ടി, എന്‍.എം ആനന്ദന്‍, കെ.ടി ജോയ്, പി.ജെ രാജു, ബുഷറ റഷീദ്, ഷീബ സുരേഷ് എന്നിവര്‍ സംസാരിച്ചു.