ചണ്ഡീഗഡ്: ബി.ജെ.പി വിട്ട മുന്‍ ക്രിക്കറ്റ് താരവും മുന്‍ എം.പിയുമായ നവജ്യോത് സിദ്ദു കോണ്‍ഗ്രസ്സിനായി അമൃത്സറില്‍ മത്സരിക്കും. നീണ്ട ചര്‍ച്ചകള്‍ക്കൊടുവിലാണ് കോണ്‍ഗ്രസ്സിന്റെ ഭാഗമാകാന്‍ സിദ്ദു തീരുമാനിച്ചത്. ജനുവരി ഒമ്പതിന് സിദ്ദു കോണ്‍ഗ്രസ് പാര്‍ട്ടി അംഗത്വം സ്വീകരിക്കും.

തിരഞ്ഞെടുപ്പില്‍ അമൃത്സര്‍ ഈസ്റ്റില്‍ കോണ്‍ഗ്രസ്സിന് വേണ്ടി മത്സരിക്കും. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയുടെയും പഞ്ചാബ് കോണ്‍ഗ്രസ് അധ്യക്ഷന്‍ അമരീന്ദര്‍ സിങ്ങിന്റെയും സാന്നിധ്യത്തിലാവും സിദ്ദുവിന്റെ പാര്‍ട്ടി അംഗത്വ സ്വീകരണം.

തര്‍ക്കത്തെ തുര്‍ന്ന് ബി.ജെ.പിയില്‍ നിന്ന് രാജ്യസഭാ എം.പി സ്ഥാനം രാജിവച്ച് പുറത്തുവന്ന സിദ്ദു ആദ്യം കെജ്‌രിവാളിന്റെ ആംആദ്മിക്കൊപ്പം ചേരാനായിരുന്നു ശ്രമം. എന്നാല്‍, ചര്‍ച്ച പരാജയമായതോടെയാണ് കോണ്‍ഗ്രസ്സുമായി സിദ്ദു ചര്‍ച്ച നടത്തിയത്. സിദ്ദുവിന്റെ ഭാര്യ നവജ്യോത് കൗര്‍ നേരത്തെ തന്നെ ബി.ജെ.പിയില്‍ നിന്നും രാജിവച്ച് കോണ്‍ഗ്രസ് അംഗത്വമെടുത്തിരുന്നു. ബി.ജെ.പി എം.എല്‍.എയായിരുന്നു നവജ്യോത് കൗര്‍.