പനാജി: ഗോവ തെരഞ്ഞെടുപ്പില്‍ മത്സരിക്കുന്ന കോണ്‍ഗ്രസ് സ്ഥാനാര്‍ഥികളുടെ പട്ടിക പുറത്തിറക്കി. 27 സ്ഥാനാര്‍ഥികളുടെ പേരുകളാണ് പുറത്തിറക്കിയത്. 40 സീറ്റുകളാണ് ഗോവ നിയമസഭയിലുള്ളത്.
നിലവിലെ എം.എല്‍.എമാരായ ദിഗംബര്‍ കാമത്ത്(മര്‍മഗോവ), ജെനിഫര്‍ മോണ്‍സരാറ്റെ(താലിഗോവ), തനദ്കാന്ത് കാവലേക്കര്‍(ക്യൂപേം), പ്രതാപ് സിംഹ് റാണെ(പൊറിയം), വിശ്വജിത്ത് റാണെ(വാല്‍പോയി) അലക്‌സിയോ റെജിനാല്‍ഡോ(ക്യൂര്‍ട്ടോറിയം) എന്നിവര്‍ക്ക് ഇത്തവണയും സീറ്റ് നല്‍കിയിട്ടുണ്ട്. നിലവില്‍ മത്സരിച്ച സീറ്റില്‍ തന്നെയാണ് ഇവര്‍ മര്‍ത്സരിക്കുക. പുറത്തുവിട്ട ശേഷിക്കുന്ന 21 സീറ്റുകളില്‍ പുതുമുഖങ്ങളാണ് മത്സരിക്കുന്നത്. എ.ഐ.സി.സി ജനറല്‍ സെക്രട്ടറി മധുസൂദനന്‍ മിസ്ത്രിയാണ് സ്ഥാനാര്‍ഥി പട്ടിക പുറത്തിറക്കിയത്.
ബി.ജെ.പിയില്‍ നിന്നും അടുത്തിടെ കോണ്‍ഗ്രസിലെത്തിയ ദയാനന്ത് സോപ്‌തെ മുഖ്യമന്ത്രി ലക്ഷ്മികാന്ത് പര്‍സേക്കര്‍ മത്സരിക്കുന്ന മണ്ഡലമായ മന്ദേരയില്‍ അദ്ദേഹത്തിനെതിരായി മത്സരിക്കും. മഹാരാഷ്ട്ര ഗോമന്തക് പാര്‍ട്ടിയും തങ്ങളുടെ സ്ഥാനാര്‍ഥിയെ ഈ മണ്ഡലത്തില്‍ നേരത്തെതന്നെ പ്രഖ്യാപിച്ചിട്ടുണ്ട്. കോണ്‍ഗ്രസിന്റെ ഗോവ സംസ്ഥാന പ്രസിഡന്റ് ലുസിഞ്ഞോ ഫലേറിയോയെ നവേലിം മണ്ഡലത്തില്‍ നേരത്തെതന്നെ സ്ഥാനാര്‍ഥിയായി പ്രഖ്യാപിച്ചിരുന്നു.